Seanca gjyqësore në GJKKO për çështjen e Inceneratorit të Tiranës është shtyrë për më 4 mars në orën 13:30, për shkak të mungesës së avokatit mbrojtës të të pandehurit Jetmir Llapaj. Në seancën e sotme, nga të pandehurit ishte i pranishëm vetëm Bledar Karoli.
SPAK kaloi për gjykim dosjen e inceneratorit të Tiranës më 13 dhjetor 2024 ndërsa në datë 2 gusht 2024, Prokuroria e Posaçme njoftoi zyrtarisht mbylljen e hetimeve për 12 personat e akuzuar.
Në këtë çështje, të pandehur janë ish-ministri i Mjedisit Lefter Koka, ish-deputeti Alqi Bllako, ish-drejtori i Punëve Publike në bashkinë e Tiranës Taulant Tusha, si dhe disa zyrtarë të tjerë të përfshirë në aferën e inceneratorëve. Ata akuzohen për shpërdorim detyre dhe korrupsion lidhur me ndërtimin e menaxhimin e inceneratorëve në Tiranë, Fier dhe Elbasan.
Në lidhje me Jetmir Llapajn, ai akuzohet për shpërdorim detyre dhe përfshirje në procedura të dyshimta lidhur me regjistrimin e kompanive të inceneratorëve në Qendrën Kombëtare të Biznesit.
