Policia e Shtetit, në bashkëpunim me partnerët ndërkombëtarë, ka lokalizuar dhe arrestuar dy shtetas shqiptarë të shpallur në kërkim.
Në Gjermani u kap 21-vjeçari Danjel Lalaj, i akuzuar nga SPAK si pjesë e një grupi kriminal në trafikun e drogës, ndaj të cilit GjKKO kishte caktuar masën e sigurisë “Arrest në burg” që prej vitit 2021. Sipas SPAK, Lalaj ishte pjesë e një grupi që mbolli 4000 bimë kanabisi në Pukë në vitin 2021. Grupi kriminal ku bënte pjesë dhe Lalaj, ka pasur edhe mbështetjen e strukturave të policisë së shtetit dhe strukturave vendore.
Ndërkohë, në Britani u ndalua 25-vjeçari Bekim Çelaj, i cili ishte i kërkuar për kultivim të bimëve narkotike dhe armëmbajtje pa leje, me masë sigurie “Arrest në burg” që prej vitit 2022.
Njoftimi i policisë:
Vijon bashkëpunimi me partnerët, për lokalizimin dhe ndalimin e shtetasve të kërkuar ndërkombëtarisht.
Kapet në Gjermani, një shtetas i akuzuar nga SPAK, si pjesëtar i një grupi kriminal në fushën e narkotikëve. Kapet në Mbretëri të Bashkuar, një shtetas i akuzuar për kultivim të bimëve narkotike dhe për armëmbajtje pa leje.
Si rezultat i sigurimit të informacioneve nga strukturat e specializuara të Policisë së Shtetit, mbi vendndodhjen e 2 shtetasve të shpallur në kërkim ndërkombëtar, dhe shkëmbimit të këtyre informacioneve nëpërmjet Interpol Tiranës, në kohë reale, me partnerët në Gjermani dhe në Mbretëri të Bashkuara, u mundësuan:
-kapja në Gjermani, e shtetasit D. L., 21 vjeç, i lindur në Pukë, pasi GjKKO-ja, në vitin 2021, i ka caktuar masën e sigurisë “Arrest në burg”, për veprën penale “Prodhimi dhe shitja e narkotikëve”, kryer në kuadër të grupit të strukturuar kriminal;
-kapja në Mbretëri të Bashkuar, e shtetasit B. Ç., 25 vjeç, i lindur në Tropojë, pasi Gjykata në vitin 2022, i ka caktuar masën e sigurisë “Arrest në burg”, për veprat penale “Kultivimi i bimëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit”.
Interpol Tirana vijon bashkëpunimin me homologët, për finalizimin e procedurave për ekstradimin e 2 shtetasve, në Shqipëri.
