Një nga personazhet emblematikë të dosjes Veliaj, Sokol Kryeziu u paraqit këtë të premte në GJKKO për zbatimin e masës së sigurisë “Detyrim paraqitje”, pasi ka qenë jashtë vendit.
Biznesmeni i kompanisë “Gerard-A” u përmend se ka blerë 50 milionë lekë piktura pranë “NAN Gallery”, që kontrollohet nga Ajola Xoxa, ndërsa më herët ka qenë një fshesar në Drejtorinë e Përgjithshme të Pastrim Gjelbërimit, punëtor ngarkim-shkarkimi apo faturino.
Kryeziu është nën hetim pasi SPAK ka dyshime se kompania në pronësi të tij, kontrollohet nga dikush tjetër. Kompania e cila figuron në emër të Kryeziut ka marrë nga Bashkia e Tiranës 23 tendera me vlerë totale 6 milionë euro.
Në lidhje me këtë ka reaguar dhe Beti Njuma, e cila shkruan se Kryeziu nga faturino në kompaninë Gerard-A, e bleu këtë kompani për 33.4 milionë lekë. Njuma vijon duke thënë se ky është biznesmeni që merrte tendera nga Veliaj dhe blinte pikturat e Ajolës.
“Ky është Sokol Kryeziu, që falë Erion Veliajt u bë “Biznesmen”, që nga fshesar në Drejtorinë e Pastrim-Gjelbërimit, punëtor ngarkim-shkarkimi në shoqërinë ‘Alb TECH PLAST, kontrollor dhe faturino në kompaninë Gerard-A, një ditë të bukur e blen këtë të fundit për 33.4 mln lekë dhe merr nga Bashkia 23 tendera me vlerë 6 milionë euro.
Ky është “Biznesmeni” (pjesë e dosjes së Erion Veliajt që leh çdo ditë nga qelia për pafajësi) që merrte tendera nga burri kryebashkiak dhe blinte pikturat e bashkëshortes Ajola. Ky postim është për ata që kanë ende dyshime dhe mëshirë për hajdutin Veliaj”, shkruajti gazetarja dhe këshilltarja e pozitës në këshillin bashkiak Njuma.
