Një tjetër kërkesë për regjistrimin e një koalicioni zgjedhor është dërguar në Komisionin Qendror të Zgjedhjeve. Partia “Lëvizja Shqipëria Bëhet” (SHB), Partia “Nisma Thurje” (Nisma), Partia “Lidhja për të Drejtat e Punëtorëve Shqiptarë” (PLDSH) kërkojnë të futen në zgjedhje si koalicion me emrin "Nisma Shqipëria Bëhet".
Ne shkresën drejtuar KQZ thuhet se partia drejtuese e koalicionit është Lëvizja Shqipëria Bëhet, dhe Adriatik Lapaj do të jetë gjithashtu drejtues i koalicionit.
"Në bazë të Kodit Zgjedhor, po ju dërgojmë kërkesën për të regjistruar në zgjedhjet e përgjithshme të 11 Majit 2025, koalicionin e partive politike të mëposhtme:
Partia “Lëvizja Shqipëria Bëhet” (SHB)
Partia “Nisma Thurje” (Nisma)
Partia “Lidhja për të Drejtat e Punëtorëve Shqiptare” (PLDSH)
Partia drejtuese e koalicionit është Partia Shqipëria Bëhet, dhe drejtuesi i saj do të jetë edhe drejtues i koalicionit. Emri i koalicionit është "Nisma Shqipëria Bëhet" – Adriatik Lapaj, dhe logoja e koalicionit do të jetë logoja e Partisë “Lëvizja Shqipëria Bëhet”. Veprimtaria e koalicionit, përgatitja e listave garuese dhe marrëdhëniet mes anëtarëve rregullohen me marrëveshje mes palëve, e cila është bashkangjitur kësaj kërkese" - thuhet në dokument.
Afati për dorëzimin e koalicioneve është mesnata e së hënës. Ky ishte koalicioni i dytë pas bashkimit të partive të Dashamir Shehit me Enekelejt Alibeajn. ©LAPSI.al
