Një 28-vjeçar nga Konispoli, i identifikuar si Pajtim Kaleshi, është arrestuar në Greqi pas një operacioni që çoi në goditjen e një rasti të trafikut ndërkombëtar të kokainës.
Policia greke identifikoi fillimisht 30-vjeçarin grek Iosif Samha, me precedentë penalë, i cili vinte me avion nga një vend i huaj. Në dy valixhet e tij, brenda aeroportit “Eleftheros Venizelos”, policia sekuestroi 16 pako me 17.3 kg kokainë.
30-vjeçari ka kryer transportin për llogari të një shtetasi shqiptar, të identifikuar me inicialet A. S, i cili është shpallur në kërkim.
Më urdhër të këtij të fundit, lënda narkotike do i dorëzohej shtetasit Pajtim Kaleshi, 28 vjeç, banues në Konispol. Policia e ka pikasur Kaleshin jashtë aeroportit dhe e ka vënë në pranga. Ai mësohet se do të kryente shitjen e drogës në Athinë.
Gjatë operacionit janë sekuestruar lënda narkotike, automjeti i Pajtim Kaleshit, 3 celularë dhe 590 euro.
Droga është marrë në Brazil nga Iosif Samha, i cili ka shkuar disa ditë më parë në Brazil, ku ka marrë lëndën narkotike dhe ka udhëtuar nga Brazili në Athine duke pasur tranzit Katarin.
