Shqiptari Arlindo M., kishte tentuar të shkaktonte një gjakderdhje në një stacion policie në Linz am Rhein të Gjermanisë natën e 6 shtatorit 2024. Megjithatë ai u bllokua nga forcat e rendit pasi për orë të tëra kishte goditur me një hanxhar një bravë xhami antiplumb në stacionin e policisë.
Prokurorja publike e cila kishte kërkuar 11 vjet burg e përshkoi kështu natën e krimit para gjykatës: “Rreth orës 02:40 ka hyrë në komisariatin e Linzit i armatosur me një hanxhar me gjatësi tehu prej 47.3 centimetra me qëllim që të vriste të gjithë policët aty”, - shkruan "BILD".
“Ai goditi dritaret me hanxhar rreth 50 herë dhe bërtiti se ishte këtu për të vrarë policët dhe nuk do të ndalonte derisa të vdiste vetë” - shtoi prokurorja.
Sipas akuzës ai ka bërtitur: “Unë do të ju vras, Allahu Ekber, Allahu Ekber, dhe do të shkoj drejt te Zoti!” Një polic i dha fund situatës së rrezikshme dhe mundi të mposhtte Arlindo M. me një pistoletë elektrike dhe më pas ta arrestonte atë.
Në banesën e tij, hetuesit gjetën prova konkrete të radikalizimit të tij, si një flamur i të ashtuquajturit Shteti Islamik (IS) i pikturuar në mur. Sipas mendimit të gjykatës, i pandehuri ishte radikalizuar i ushqyer nga thirrjet në forumet e internetit të IS.
Me rastin e caktimit të dënimit me 8 vite burg, gjykata ka marrë parasysh se nga sulmi nuk është lënduar askush tjetër përveç të pandehurit. Arlindo M., i cili vuan nga një çrregullim personaliteti, kishte humbur punën pak kohë para krimit dhe po ashtu ishte prishur edhe martesa e tij. ©LAPSI.al
