Përfundoi rreth orës 18.00 takimi maratonë i kryeministri Edi Rama me drejtuesit politikë të qarqeve të Partisë Socialiste në 12 qarqet e vendit. Takimi nisi rreth orës 10 të mëngjesit të kësaj të diele dhe u zhvillua me dyer të mbyllura në vilën qeveritare numër 30 në zonën e ish-Bllokut.
Rama takoi njëri pas tjetrit drejtuesit e qarqeve ndërsa i pranishëm ka qenë edhe sekretari i Përgjithshëm i PS-së, Blendi Klosi. Secili prej drejtuesve të qarqeve ka dhënë propozimet e tij për për emrat që konsiderohen si përfaqësues më të mirë të qarkut të tyre.
Më pas emrat do të shqyrtohen në kryesinë e PS-së që do të mblidhet më 12 mars kur edhe afati i fundit i vendosur nga KQZ për dorëzimin e listave të kandidatëve. Do të jetë vetë Rama që në mbledhjen e kryesisë së PS-së që do të zhvillohet atë ditë do të prezantojë se cili do të jetë në listat e mbyllura dhe kush do të duhet të luftojë për një vend në parlament nëpërmjet listës së hapur.
Në total janë 186 emra kandidatësh që do të zyrtarizohen në mbledhjen e kryesisë së PS. Rama u takua fillimisht me Blendi Klosin që është edhe drejtues politik i qarkut të Dibrës.
Më pas dëgjoi propozimet e Mirela Kumbaros, drejtuese politike e qarkut të Gjirokastrës, Ulsi Manja drejtues politik i qarkut të Lezhës, Emirjana Sako, drejtuese politike e qarkut të Durrësit, Benet Beci, drejtuesi politik i qarkut të Shkodrës, Bledi Çuçi, drejtues politik i qarkut të Vlorës dhe Niko Peleshin, drejtues politik i qarkut të Korçës.
Pas një pushimi dreke rreth orës 15.00 Rama priti Eduard Shalsin, drejtuesin politik të qarkut të Kukësit, Ogerta Manstirliun drejtuesen politike të Tiranës, Ervin Demon, drejtuesin politik i qarkut të Beratit, Belinda Ballukun, drejtuese politike e qarkut të Fierit dhe Arbjan Maznikun, drejtuesin politik të qarkut të Elbasanit.
Në fund Rama takoi edhe kryeparlamentaren Elisa Spiropali që është drejtuese politike e qarkut të Tiranës. ©LAPSI.al
