Në një skenë që duket e shkëputur nga një thriller kriminal, pesë shqiptarë, anëtarë të dyshuar të një rrjeti kriminal, janë arrestuar për 49 grabitje në rezidenca luksoze dhe shtëpitë e personazheve publike në Francë dhe Belgjikë. Ky grup, i njohur si “Nikla”, drejtohej nga Edison Pula, një shqiptar në të tridhjetat, i njohur për arratisjet e tij spektakolare nga drejtësia.
Sipas xhandarmërisë franceze, grabitësit kishin në shënjestër këngëtarë, futbollistë dhe pilotë të Formula 1, duke përdorur rrjetet sociale për të identifikuar adresat e viktimave të tyre. Sendet e vjedhura, përfshirë bizhuteri, orë me vlerë të lartë dhe çanta luksoze, me një vlerë totale mbi një milion euro, shiteshin kryesisht në Shqipëri.
Arrestimet u kryen në dy faza: dy anëtarë të dyshuar u arrestuan më 20 janar në Luksemburg, ndërsa pesë të tjerë u ndaluan të martën në zonën e Reims-it, me katër prej tyre të marrë në hetim të premten. Edison Pula, i cili ishte në kërkim nga Interpoli që prej janarit të kaluar, u identifikua falë gjurmëve të ADN-së të gjetura në më shumë se 30 grabitje të kryera midis qershorit 2022 dhe shtatorit 2024.
Hetimet u zhvilluan nga Zyra Qendrore për Luftën kundër Kriminalitetit Itinerant, në bashkëpunim me Seksionin e Kërkimeve dhe Brigadën e Kërkimeve të Reims-it, si dhe Brigadën për Luftën kundër Banditizmit të Policisë Kriminale të Parisit.
