Shërbimet e Stacionit të Policisë së Velipojës njoftuan se pasditen e së hënës morën një sinjal nga një shtetas francez me iniciale B. D., i cili kishte dalë me not në breg të detit në plazhin e Pulajt.
Ai kishte kërkuar ndihmë për dy turiste nga Kroacia, me iniciale I. K., dhe I. Sh., të cilat si pasojë e dallgëve të shumta, lundra në të cilën ndodheshin po largohej drejt thellësisë dhe për këtë shkak u rrezikohej seriozisht jeta.
“Shërbimet e Policisë në bashkëpunim me Postën Kufitare Velipojë dhe me ndihmën e Policisë Malazeze të cilët ndërhynë menjëherë me helikopter dhe një mjet lundrues, bënë të mundur nxjerrjen nga deti me një mjet lundrues të Policisë malazeze të dy turisteve kroate, të cilat po dërgohen për ndihmë mjekësore në Ulqin, jashtë rrezikut për jetën.
Drejtoria Vendore e Policisë Shkodër dhe Drejtoria Vendore për Kufirin dhe Migracionin falënderojnë Policinë malazeze për reagimin në kohë dhe ndihmën për lokalizimin dhe shpëtimin e dy turisteve” – thuhet në njoftimin e policisë shqiptare. ©LAPSI.al
