Indrit Brahimllari, një ish besnik i Monika Kryemadhit dhe Ilir Metës ka gjetur një kolltuk të ri për t'u ulur mes kandidaturave për deputetë të Partisë Socialiste për Tiranës.
Ish-nënkryetari i Partisë së Lirisë u përjashtua pas një lufte të brendshme mes çiftit Meta-Kryemadhi në lidhje me dosjet e SPAK dhe mosmarrëveshjet për balancat në parti. Dhe tani nga një “ushtar” besnik i LSI-së, që dikur hidhte helm mbi Ramën, ka rilindur si socialist i denjë për t’u futur në listat për deputet në Tiranë.
Prej disa muajsh, Brahimllari endej në korridoret e Këshillit Bashkiak si këshilltar “i pavarur”, por duket se kjo ka qenë një fazë e përkohshme, një pritje për të gjetur një derë të hapur në Partinë Socialiste.
Vetëm se para se të firmosë në teserën e Partisë Socialiste, Brahimllari kishte firmosur në protokollet e SPAK për hetimin e lobimeve të dyshimta të LSI-së në kohën kur Meta ishte në krye të partisë. Po bëhet e zakonshme tashmë që kush ka ndonjë çështje të hapur në SPAK, rehabilitohet në një listë deputetësh si një mënyrë elegante për të shmangur problemet me drejtësinë
Pas kaq intrigash në politikë, është naive të flasësh për tradhti. Sepse në politikën shqiptare tashmë është e vështirë të gjesh parime apo bindje – edhe pse mund të gjesh sa të duash vende bosh në listat e deputetëve.
https://www.youtube.com/watch?v=FGC0rV0SZ3M&ab_channel=PANORAMATV
