Këtë të hënë, 17 mars, Kuvendi do të mblidhet për një tjetër seancë maratonë, ku në rend dite janë 25 pika për diskutim. Në to bien në sy dhe kanë më shumë interes përzgjedhja dhe votimi i anëtarëve të Këshillit Drejtues së RTSH-së, me 10 kandidaturat që u kaluan këtë javë te Komisioni i mediave pas dëgjesës së mbajtur, si dhe i kryetarit të Këshillit.
Komisioni gjithashtu ka përzgjedhur më 11 mars 2 emrat kandidatë: Helidon Haliti ose Fatjon Hoxhalli që garojnë për kryetar të Këshillit Drejtues të RTSH. Kuvendi kishte shkarkuar Këshillin Drejtues të RTSH-së pas shkeljeve të shumta të gjetura në procedurat e garës për përzgjedhjen e drejtorit të përgjithshëm të RTSH-së.
Gjithashtu në rend ditë është edhe votimi për anëtarët e Bordit të Institutit të Studimeve për Krimet dhe Pasojat e Komunizmit në Shqipëri. Po të hënën do të diskutohet dhe votohet për projektligjin për Bankën Shqiptare të Zhvillimit, nismë kjo e qeverisë shqiptare, për t’i ardhur në ndihmë bujqësisë dhe fermerëve. Mes të tjerësh është edhe diskutimi për strukturën dhe organika e INSTAT-it.
