Partia Demokratike është duke mbajtur protestë para Kryeministrisë kundër mbylljes së TikTok. Një grup të rinjsh, të udhëhequr nga kreu i FRPD Besart Xhaferri u nisën nga selia blu për t’iu bashkuar protestës. Ndërkohë kryedmokrati Sali Berisha ka dalë nga banesa e tij dhe i është drejtuar bulevardit për të mbërritur në Kryeministri.
Nënkryetari i Partisë Demokratike, Flamur Noka, në një deklaratë të shkurtër për mediat akuzoi kryeministrin Edi Rama se dha vendimin për mbylljen e “TikTok”, ‘pasi ka frikë nga fjala e lirë’.
“Edi Rama këtë ka pasur për qëllim, të eliminojë çdo rrjet social që tregon të vërtetën. TikTok është një platformë që i çirret maska Edi Ramës. Çfarë do të bëjë, Rama do të mbetet në histori si armiku i fjalës së lirë dhe armiku i shqiptarëve në tërësi”, tha Noka.
PD ka marrë dy orë leje për zhvillimin e protestës. Të rinjtë demokratë do të udhëheqin protestën sot duke mbajtur dhe fjalime.
