Godina e depos farmaceutike CFO Pharma me pronar Nadir Çausholli, është sulmuar me armë këtë të martë. 20 predha janë gjetur në vendin e ngjarjes, dhe paraprakisht dyshohet se është qëlluar nga një makinë në lëvizje. Autorët dhe shkaqet e ngjarjes mbeten të pazbardhura deri më tani.
Breshëri plumbash janë lëshuar drejt godinës të një biznesi në autostradën Tiranë-Durrës. Burime bëjnë me dije se persona të paidentifikuar të cilët lëviznin me një automjet kanë qëlluar me kallashnikov fasadën e godinës së CFO Farma, biznes i cili është në pronësi të Nadir Çaushollit.
Nga verifikimet e bëra rezulton se në drejtim të depos farmaceutike është qëlluar mbi 20 herë, ndërsa predhat e plumbave kanë dëmtuar fasadën prej xhami të kompanisë së importit të ilaçeve. Nga pamjet e marra prej kamerave të sigurisë rezulton se autorët kanë qenë dy. Njëri prej tyre ka qëlluar në drejtim të godinës, ndërsa tjetri ishte në rolin e shoferit. Mësohet se automjeti ka qëndruar para godinës, është qëlluar në drejtim të biznesit dhe më pas autorët janë larguar në drejtim të Vorës. Orientimi i të shtënave ka qenë kati i fundit i objektit. Ende nuk dihen shkaqet që kanë çuar në këtë sulm ndaj depos farmaceutike të Nadir Çaushollit teksa grupi hetues po mbledh prova dhe dëshmi për ta dokumentuar ngjarjen.
