Kolegjit të Posaçëm të Apelimit, KPA shpalli të martën më 18 mars vendimin për lënien në fuqi të vendimit për shkarkimin nga detyra të prokurorit të Fierit, Erind Reovica. Vendimi u mor në mënyrë unanime nga trupi gjykues i Kolegjit i kryesuar nga
Sokol Çomo, me relatore Rezarta Schuetz dhe anëtare Albana Shtylla, Ina Rama, e Mimoza Tasi, pas shqyrtimit në dhomë këshillimi të ankimit të Reovicës.
Prokurori Erind Rovica u shkarkua nga detyra më 10 shkurt 2022, pasi Komisioni i Pavarur i Kualifikimit, KPK konkludoi se kishte kryer deklarim të pamjaftueshëm për pasurinë, se ishte i papërshtatshëm për profesionalizmin dhe se me veprimet dhe mosveprimet e tij kishte cënuar besimin e publikut tek drejtësia – përfundime që u ankimuan në Kolegj si të pabazuara prej këtij subjekti.
Erind Reovica ka qenë oficer i policisë gjyqësore që në vitin 2005 deri në 2014-ën, kur filloi të ushtrojë detyrën e prokurorit në Prokurorinë pranë Gjykatës së Rrethit Gjyqësor Fier.
