Aventura e Sergio Conceicaos në pankinën e Milan ka shumë gjasa të përfundojë. Në fund të kampionatit, fati i trajnerit portugez duket i vulosur, dhe klubi kuqezi ka filluar të shqyrtojë me vendosmëri të gjitha opsionet për të ardhmen. Çështja e trajnerit mund të ketë marrë tashmë një kthesë të rëndësishme. Sipas asaj që shkruan sot “Gazzetta dello Sport”, Giorgio Furlani, administratori i deleguar i Milan, ka konsumuar një telefonatë me teknikun Massimiliano Allegri. Është lëvizja e parë, një urë, një gur themeli për të ndërtuar të ardhmen.
Në bisedën mes drejtuesit kuqezi dhe ish-trajnerit të Juventus nuk është folur për një ofertë konkrete apo për mundësinë që Allegri të rikthehet në pankinën e Milan, por ka qenë thjesht një përshëndetje mes miqsh. Megjithatë, Furlani është e qartë se synon të ndërtojë Milanin e ri rreth teknikut Allegri, duke u mbështetur në themelet e merkatos së fundit ambicioze të klubit. Por nuk ndalet këtu. Furlani ka marrë nga Gerry Cardinale edhe dritën jeshile për të zgjedhur drejtorin e ri sportiv. E sipas “Repubblica”, zgjedhja ka rënë mbi Fabio Paratici, një tjetër ish-Juventus.
Allegri dhe Paratici bashkë edhe te Juventus
Të dy janë takuar për herë të parë gjatë periudhës së parë të teknikut Allegri në krye të Juventus. Më pas, në kthimin e tij te bardhezinjtë, Paratici ishte larguar për te Tottenham. Kjo ndodhi përpara pezullimit të tij për shkak të hetimeve mbi llogaritë financiare të bardhezinjve, një dënim që do ta mbajë atë jashtë futbollit deri më 20 korrik. Pas kësaj date, Paratici do të ishte i lirë të punonte dhe të vihej në dispozicion të Milan – ndoshta edhe të teknikut Allegri. Ndërkohë, thuhet se mes të dyve ka pasur edhe një darkë në Milano, por nuk ka konfirmime zyrtare. Për momentin, gjithçka zhvillohet në hije.
Lexo më tej: Furlani nuk e do: Igli Tares i ikën nga duart posti i drejtorit sportiv të Milan
Furlani ndërhyri për Paratici, kur Ibra kishte aprovuar Taren
Në këtë fazë strategjike dhe planifikimi, pas një sezoni zhgënjyes – edhe pse Milani ka fituar Superkupën e Italisë dhe po lufton ende për Kupën e Italisë, me derbin ndaj Interit në horizont – “Repubblica” zbulon se zgjedhja e Paratici është bërë nga vetë Furlani. Kjo, pavarësisht se gjatë takimit në Londër mes Cardinale dhe Ibrahimoviç, ish-sulmuesi suedez kishte dhënë miratimin e tij për Igli Taren. Për momentin, ka ende shumë pasiguri rreth manovrave të Milanit, por klubi po përpiqet të përshpejtojë procesin për të qenë gati në fillim të sezonit të ardhshëm.
