Një pilulë në ditë, që duhet marrë para agimit. Lamine Yamal duhet ta marrë, trupi i tij e kërkon. Nuk është një sekret, dhe pas kësaj recete mjekësore nuk fshihet asnjë sëmundje. Futbollisti është me besim mysliman dhe gjatë kësaj periudhe të Ramazanit ka nevojë të ndjekë një dietë specifike, e cila e ndihmon të ruajë performancën sportive, pavarësisht kufizimeve që sjell agjërimi për arsye fetare. Gjendja e lojtarit monitorohet vazhdimisht si nga stafi mjekësor i Kombëtares, ashtu edhe nga Barcelona, përmes ekspertëve të nutricionizmit: duke qenë ende i mitur, situata e tij i nënshtrohet protokolleve të mbrojtjes së të miturve dhe kujdesi për shëndetin dhe mirëqenien e tij shkon përtej aspektit sportiv.
Rrëfimi i talentit të Barcelonës
“Sot u zgjova në orën katër të mëngjesit dhe hëngra një mëngjes të bollshëm” – ka rrëfyer Yamal në një intervistë për Diario AS, duke shpjeguar rutinën e tij për të balancuar agjërimin dhe aktivitetin fizik. “Në këtë mënyrë mund të zgjohem më vonë se të gjithë të tjerët, sepse nuk e ha mëngjesin bashkë me pjesën tjetër të skuadrës. Pastaj shkoj në stërvitje dhe kthehem në dhomën time për të vazhduar lutjet”.
Rutina e tij është e organizuar sipas një programi të personalizuar, i cili e ndihmon të ruajë ekuilibrin e duhur: mëngjesi/dreka, të cilës ai i referohet, i shërben për të grumbulluar mjaftueshëm energji deri në perëndimin e diellit, kur mund të fillojë të hajë sërish. “Kështu do të jetë deri në momentin kur mund ta ndërpres agjërimin. Më pas marr një pilulë, janë elektrolite që ndihmojnë në hidratimin për pjesën tjetër të ditës”.
Lexo më tej: Goli i pabesueshëm i Lamine Yamal ndaj Benfica: Raphinha i pastron këpucën
Lutja dhe planifikimi i vakteve, stërvitja dhe ushqyerja janë për të njëlloj si filozofia e vjetër “ora et labora” (lutu dhe puno): Yamal duhet të kompensojë furnizimin me energji dhe rezistencën fizike për të ruajtur një nivel të lartë performancash gjatë kësaj periudhe kufizimesh. Për këtë arsye, pilula për të cilën ai flet është e pazëvendësueshme: mineralet kryesore (natriumi, kaliumi dhe magnezi), që humbasin përmes djersitjes, duhet të rimbushen sepse janë thelbësore për të ruajtur ekuilibrin e lëngjeve në trup, funksionin nervor dhe kontraktimin e muskujve. “Nuk kam kurrë uri”, ka pranuar ai, duke theksuar rëndësinë e marrjes së elektroliteve në mëngjes.
Për çfarë shërben pilula e elektroliteve që merr Yamal?
Humbja e elektroliteve ndodh kur trupi fillon të djersijë, prandaj është e nevojshme të rimbushet sasia e lëngjeve të humbura. Në ato momente, organizmi dërgon një sërë sinjalesh/simptomash që tregojnë çekuilibrimin dhe që duhen kompensuar: nga ndjenja e dobësisë dhe dhimbjet e kokës, deri te probleme më serioze (që varen nga individi), si nausea, të vjella, ritëm i çrregullt i zemrës apo (në rastet më të rënda) konvulsione.
