“Si Tarzani pa majmu*in Çita”: fraza e presidentit të CONMEBOL tërbon Brazilin

Presidenti i CONMEBOL, Alejandro Domínguez, është vënë në qendër të kritikave të shumta në Brazil pas një fraze të tij, lidhur me një mungesë të mundshme të klubeve braziliane në Copa Libertadores, që sipas tij do të ishte “si Tarzani pa majmunin Çita”. Mesfushori i Brazilit, Bruno Guimarães, i ka kritikuar ashpër këto deklarata kontroverse në prag të ndeshjes që Seleção do të luajë kundër Kolumbisë për kualifikueset e Kupës së Botës 2026: “Presidenti i CONMEBOL-it ka shumë gjëra për të cilat duhet të shqetësohet përpara se të bëjë batuta të tilla”.

Kritikat për rastin e racizmit ndaj Luighi Hanri

Bruno Guimarães ka kritikuar gjithashtu mënyrën se si organi më i lartë i futbollit në Amerikën e Jugut trajtoi rastin e racizmit ndaj sulmuesit të ri brazilian të Palmeiras, Luighi Hanri. Ky i fundit shpërtheu në lot para kamerave pas një ndeshjeje të Copa Libertadores U-20 kundër Cerro Porteño, pasi tifozët e kishin quajtur “majmun” gjatë gjithë ndeshjes. “Për mua, dënimi për Cerro Porteño ishte një mungesë e madhe respekti”, tha Guimarães, i cili shmangu kritika të mëtejshme ndaj CONMEBOL-it nga frika e ndëshkimeve, por i kërkoi federatës që “të zbatojë rreptësisht ligjin” në rastet e racizmit.

DECLARAÇÃO ABSURDA E INACEITÁVEL DO PRESIDENTE DA CONMEBOL! 😡

Alejandro Domínguez comparou a Libertadores sem brasileiros com Tarzan sem Chita, chimpanzé que era personagem de filmes dos anos 30 e 40. pic.twitter.com/NiOWJYmhMN — TNT Sports BR (@TNTSportsBR) March 18, 2025

CONMEBOL e gjobiti klubin paraguajan me 50.000 dollarë, ndaloi tifozët e tij të merrnin pjesë në Copa Libertadores U-20 dhe i urdhëroi të publikonin në rrjetet e tyre sociale një “fushatë sensibilizimi kundër racizmit”. Gjithashtu, trajneri i ekipit, Daniel Achucarro, u pezullua për dy ndeshje. Në atë kohë, presidentja e Palmeiras, Leila Pereira, e cilësoi këtë ndëshkim tepër të lehtë dhe sugjeroi që klubet braziliane të bashkoheshin me CONCACAF-in (konfederatën e Amerikës së Veriut dhe Qendrore) nëse CONMEBOL nuk arrinte të ndalte racizmin në stadiume.

“Do të ishte si Tarzani pa majmunin Çita, e pamundur”

Të hënën, gjatë shortit të fazës së grupeve të Copa Libertadores, Alejandro Domínguez kërkoi një takim mes federatave dhe qeverive të Amerikës së Jugut për të trajtuar problemin e racizmit. Megjithatë, deklarata e tij e mëvonshme, ku krahasoi turneun me Tarzanin dhe klubet braziliane me majmunin Çita, shkaktoi një valë reagimesh negative. “Do të ishte si Tarzani pa majmunin Çita, e pamundur”, tha presidenti i CONMEBOL-it kur u pyet nëse mund të imagjinonte një Copa Libertadores pa skuadrat braziliane, të cilat kanë dominuar turneun vitet e fundit.

pic.twitter.com/6FtZ1Vunxs

— Alejandro Domínguez (@agdws) March 18, 2025

Ndjesa e Alejandro Domínguez: “Nuk doja të ofendoja askënd”

Pasi debati mori përmasa të mëdha, Alejandro Domínguez kërkoi falje përmes një deklarate në rrjetet sociale, duke shpjeguar se kishte përdorur një “shprehje popullore”, por nuk kishte qëllim “të ofendonte apo të nënvlerësonte askënd”. “Copa Libertadores e CONMEBOL-it është e paimagjinueshme pa pjesëmarrjen e klubeve nga 19 vendet anëtare”, shkroi ai. Në deklaratën e tij, Domínguez theksoi se ka “promovuar gjithmonë respektin dhe përfshirjen në futboll dhe në shoqëri”, të cilat i konsideron si “vlera thelbësore për CONMEBOL-in”. Në fund, ai shtoi: “Riafirmojmë angazhimin tonë për një futboll më të drejtë, të bashkuar dhe pa diskriminim”.