Policia arrestoi drejtuesin e betonieres që la të vdekur në një aksident në Fushë-Prezë 4 të rinj. Ngjarja ndodhi mbrëmjen e të mërkurës së 19 Marsit në segmentin rrugor Vorë – Fushë Krujë.
Shkak për vdekjen e të rinjve ishte fakti që makina tyre ishte me impiant gazi dhe shpërthimi nga flakët ishte fatal për 4 të rinjtë.
Drejtuesi i makinës ishte Enejdi Laçi, 25 vjeç dhe tre pasagjerët në mjetin e tij, Erildi Laçi, 20 vjeç, Enrikejd Kurti, 24 vjeç dhe Andi Laçi, 22 vjeç janë djegur brenda mjetit. Enejdi dhe Erildi Laçi ishin vëllezër, ndërsa Andi Laçi ishte kushëri me ta. Viktima e katërt Enrikejd Kurti ishte shok me tre të parët.
Sipas Policisë Rrugore të Tiranës, automjeti tip “Mercedes Benz”, me drejtues Enejd Laçi 25 vjeç, lëvizte me shpejtësi të lartë kur goditi nga pas një betoniere të ndaluar në rrugë. Betonierea, e drejtuar nga Aleksandër Krrashi, 24 vjeç, ishte ndaluar në karrexhatë pa ndezur sinjalistikën e emergjencës dhe pa pasur leje drejtimi për këtë kategori mjetesh. Pas përplasjes, “Mercedes”-i u përfshi nga flakët, duke shkaktuar vdekjen e drejtuesit dhe tre pasagjerëve të tij.
Drejtuesi i betonieres, Aleksandër Krrashi u largua nga vendi i ngjarjes pas aksidentit, por u arrestua më pas nga Policia, së bashku me një të afërm të tij, i cili dyshohet se e ndihmoi të largohej nga vendngjarja.
Në pranga ka përfunduar edhe D. K., 34 vjeç, menaxheri i firmës së betonit, pasi hetimet zbuluan se firma kishte punësuar drejtuesin e betonieres pa leje për këtë mjet dhe pa dokumentacionin e rregullt për qarkullim.
Ndërkohë, administratori i firmës, S. H., 27 vjeç, është shpallur në kërkim dhe vijojnë përpjekjet për kapjen e tij.
