Presidenti i SHBA-ve Donald Trump ka nënshkruar një urdhër ekzekutiv që synon shpërbërjen e Departamentit të Arsimit, të cilin ai e ka akuzuar për shpërdorim të dollarëve të taksapaguesve dhe promovim të eksperimenteve progresive sociale. Sipas urdhrit, heqja dorë nga departamenti do t’u ofronte fëmijëve dhe familjeve të tyre mundësinë për t’i shpëtuar një sistemi që po i dështon. Urdhri është pjesë e një fushate më të gjerë për të shkurtuar “shpenzimet e kota” dhe burokracinë e udhëhequr nga ‘Departamenti i Efiçencës së Qeverisë’ (DOGE) të drejtuar nga Elon Musk.
“Rezultatet e matematikës dhe leximit janë ulur në shkollat publike, pavarësisht se shpenzimet për nxënës janë rritur me më shumë se 245% që nga vitet 1970, duke treguar se më shumë shpenzime nuk do të thotë arsim më i mirë. Paratë e taksapaguesve nuk do të shpenzohen më për eksperimente progresive sociale dhe programe të vjetruara", tha Shtëpia e Bardhë.
Zëdhënësja e Shtëpisë së Bardhë Karoline Leavitt tha se departamenti do të jetë shumë më i vogël se sa është sot dhe do të vazhdojë të administrojë kredi studentore dhe grante federale.
I krijuar në vitin 1979, departamenti kishte për detyrë të mbikëqyrë arsimin, të lëshojë grante dhe ndihmë studentore, si dhe të zbatojë politikat kundër diskriminimit në shkollat e financuara nga qeveria federale. Trump ka argumentuar prej kohësh se ajo është bërë e kotë dhe e politizuar.
Të enjten, presidenti udhëzoi Sekretaren e Arsimit Linda McMahon që të ndërmarrë të gjitha hapat e nevojshëm për të lehtësuar mbylljen e Departamentit të Arsimit dhe kthimin e autoritetit arsimor në Shtetet dhe komunitetet lokale.
