Një 20-vjeçar është arrestuar nga policia në Shkodër pasi është kapur duke qarkulluar me armë dhe municion luftarak në makinë.
I riu është ndaluar për një kontroll rutinë nga Policia në lagjen "Skënderbeg" dhe nga kontrollet i janë gjetur në çantë një armë zjarri pushkë me municion luftarak të cilat posedoheshin pa leje, me qëllim shitjen.
Njoftimi i policisë:
Finalizohet operacioni policor i koduar “Vendtakimi”. Lëvizte me automjet, për të shitur një armë zjarri, arrestohet në flagrancë 20-vjeçari. Sekuestrohet arma e zjarrit pushkë me municion luftarak.
Në kuadër të aksioneve të njëpasnjëshme të Policisë, me objektiv identifikimin dhe arrestimin e shtetasve që posedojnë armë zjarri, pa leje, dhe përbëjnë rrezik për sigurinë publike, shërbimet e Komisariatit të Policisë Shkodër finalizuan operacionin “Vendtakimi”.
Gjatë operacionit, u kap në flagrancë dhe u vu në pranga shtetasi Mateo Ndreu, 20 vjeç, banues në fshatin Hot i Ri.
Shërbimet e Patrullës së Përgjithshme ndërhynë menjëherë për të ndaluar në lagjen “Skënderbeg”, automjetin me të cilin lëvizte shtetasi M. N.. Nga kontrollet, u gjet në çantën e këtij shtetasi, një armë zjarri pushkë me municion luftarak, e cila posedohej pa leje, me qëllim shitjen. Materialet procedurale iu referuan Prokurorisë së Shkodrës, për veprime të metejshme.
