Humbja me Anglinë ishte e parashikueshme deri diku, por tani me Andorrën nuk lejohen gabimet. Sylvinho e ka të qartë, ndaj e ktheu Kombëtaren shqiptare në fushë menjëherë pas ndeshjes me Anglinë, të luajtur dy netë më parë në stadiumin Wembley. Kuqezinjtë kanë zhvilluar një seancë stërvitore në stadiumin “The Hive” të Londrës, që ka zgjatur pak më shumë se 60 minuta. Lojtarët të cilët nuk u aktivizuan dhe ata që luajtën si zëvendësues kanë zhvilluar stërvitje me ngarkesë të plotë, ndërsa titullarët kanë punuar vetëm në palestër.
Strakosha në dyshim
Departamenti i Komunikimit në FSHF bën me dije se portieri Thomas Strakosha, i cili u zëvendësua gjatë ndeshjes me Anglinë për shkak të një goditjeje që mori gjatë lojës, është duke u mbajtur nën monitorimin e vazhdueshëm nga stafi mjekësor kuqezi. Gjendja e tij paraqitet e mirë dhe mjekët janë optimistë që ai mund të rikuperohet për ndeshjen e të hënës ndaj Andorrës në Arena Kombëtare. Pjesa tjetër e lojtarëve nuk kanë shfaqur probleme fizike dhe janë të gjithë në dispozicion të teknikut Sylvinho për sfidën e dytë të kualifikueseve.
Lexo më tej: Botërori 2026, kualifikuese: Shqipëria humb 2-0 përballë Anglisë
Programi i Kombëtares
Kombëtarja kuqezi udhëtoi drejt Shqipërisë po të shtunën, kur mbërriti gjatë orëve të pasdites. Sot, në orën 16:45 do të zhvillohet konferenca zyrtare e trajnerit Silvinjo në stadiumin “Arena Kombëtare” dhe në 17:30 do të jetë stërvitja zyrtare, që do të jetë e hapur 15 minutat e para për mediat. Andorra do të zhvillojë konferencën zyrtare në ora 18:15 po në stadiumin “Arena Kombëtare” dhe seancën stërvitore në ora 19:00.
