Ish-kryeministri italian Romano Prodi është vënë në qendër të një polemike me një gazetare të emisionit “Quarta Repubblica” që transmetohet në Rete 4. Gazetarja Lavinia Orefici i bëri një pyetje Prodit pas prezantimit të një libri të tij duke cituar një paragraf.
Në një deklaratë të Rete 4 thuhet se Prodi i dha një përgjigje pa respekt dhe e tërhoqi nga flokët gjatë përgjigjes.
“Çfarë pyetje dreqin është kjo? Kjo është një mënyrë vulgare për të bërë politikë”, - ishte përgjigja e Prodit, me një ton të acaruar dhe sarkastik. “Në dekada punë, nuk do ta prisnim kurrë një gjest të tillë ndaj një kolegeje nga një ish-kryeministër”, - thuhet në deklaratë.
"Prodi, përveçse iu përgjigj pyetjes sime me një ton agresiv dhe frikësues, më kapi një tufë flokësh dhe ma shkuli. E ndjeva dorën në flokë, ishte tronditëse për mua. Kam 10 vjet që punoj në Mediaset, e dërguar jashtë vendit në fronte të ndryshme dhe nuk kam përjetuar një situatë të tillë. U ndjeva e ofenduar si gazetare dhe si grua” – u shpreh gazetarja.
“Nuk i kam prekur dhe as i kam tërhequr flokët gazetares nga Quarta Repubblica, Lavinia Orefici, por siç mund të dëshmojnë të gjithë gazetarët dhe të pranishmit, i vura dorën mbi sup sepse po thoshte gjëra absurde” – u shpreh ish-kryeministri Romano Prodi për agjencinë Ansa. ©LAPSI.al
