Gjykimi i aktorit francez Zherar Depardje, i cili është akuzuar për sulm seksual ndaj dy grave gjatë një xhirimi filmi në vitin 2021, ka nisur në një gjykatë në Paris.
Ngjarja konsiderohet si një moment vendimtar për lëvizjen #MeToo në Francë.
Të hënën, Depardieu, 76 vjeç, qëndroi ulur përballë gjyqtarit, ndërsa të dyja paditëset ishin gjithashtu të pranishme në sallën e gjyqit.
Prokurorët pretendojnë se sulmet ndaj grave, identitetet e të cilave nuk janë zbuluar plotësisht, ndodhën gjatë xhirimeve të filmit Les Volets Verts (Dritaret e Gjelbra).
Ata e akuzojnë Depardieu se ngacmoi njërën prej grave në setin e filmit, duke e tërhequr drejt vetes dhe duke e zënë me këmbët e tij, përpara se t’i prekte belin, ijet dhe gjoksin, ndërkohë që thoshte fjalë të turpshme. Tre persona kanë qenë dëshmitarë të skenës, thanë prokurorët.
Ata shtuan se gruaja e dytë u ngacmua nga Depardieu si në set, ashtu edhe në rrugë.
Përpara se të niste gjyqi, Depardieu, me dorën mbi supin e avokatit të tij, kaloi qetësisht para gazetarëve, duke i parë drejt e në kamera pa thënë asnjë fjalë, përpara se të hynte në sallën e gjyqit dhe të shkëmbente disa fjalë me disa aktorë të pranishëm atje. Avokati i tij, Jérémie Assous, u tha gazetarëve se akuzat janë të rreme dhe të bazuara në gënjeshtra.
“E vërteta është në anën tonë,” tha ai.
