Ministri i Shëndetësisë, Arben Taravari ka dhënë detaje lidhur me gjendjen shëndetësore të personave të personave të lënduar nga zjarri në Koçan.
Taravari u shpreh se pacientët që po trajtohen në spitalet e Maqedonisë së Veriut janë në gjendje të mirë shëndetësor. Nëntë pacientë është planifikuar të dalin nga spitali në fillim të javës, pasi të jenë kryer të gjitha analizat toksikologjike dhe psikologjike.
Ndërkohë në spitalet jashtë vendit janë 115 pacientë, pesë prej të cilëve vazhdojnë të jenë në gjendje kritike shëndetësore. Fatmirësisht rreth një javë pas tragjedise nuk ka pasur asnjë person të lënduar që ka ndërruar jetë.
"Presim përmirësim të situatës. Javën e ardhshme kemi njoftime për kthimin e më shumë pacientëve në vend”, tha Taravari në një deklaratë për mediat sot pas përfundimit të mbledhjes së rregullt të krerëve të krizës.
Një zjarr që shpërtheu në klubin e natës “Pulse”, në Koçan të Maqedonisë së Veriut, mëngjesin e 16 marsit, i mori jetën 59 persona dhe la të lënduar mbi 150 të tjerë. Zjarri shpërtheu gjatë një koncerti me mbi 500 pjesëmarrës, duke u përhapur me shpejtësi pas ndezjes së mjeteve piroteknike. Autoritetet kanë nisur një hetim të gjerë lidhur me ngjarjen e rëndë.
