Më shumë se 178,000 raste të kolerës janë konfirmuar në 16 vende në Afrikën lindore dhe jugore nga janari 2024 deri në mars 2025, tha Fondi i Kombeve të Bashkuara për Fëmijët (UNICEF).
Numri befasues, i përkeqësuar nga aksesi i kufizuar në ujë, kanalizime, higjienë dhe shërbime shëndetësore, ka rezultuar në rreth 2,900 vdekje, shumë prej të cilëve janë fëmijë, tha UNICEF.
“Ne kemi nevojë për angazhimin e vazhdueshëm të qeverive, sektorit privat dhe individëve që besojnë se çdo fëmijë meriton një të ardhme,” tha drejtoresha rajonale e UNICEF-it për Afrikën Lindore dhe Jugore Etleva Kadilli në një deklaratë në Nairobi, kryeqyteti i Kenisë.
Sipas UNICEF-it, Sudani i Jugut dhe Angola janë përballur me shpërthimet më të rënda të kolerës, ku fëmijët nën 15 vjeç përbëjnë 50 për qind të rasteve në Sudanin e Jugut dhe 40 për qind në Angola.
UNICEF tha se më shumë se 40,000 raste u raportuan në Sudanin e Jugut nga 28 shtatori 2024 deri më 18 mars 2025, duke përfshirë 694 vdekje në mbarë vendin, shpërthimi i tij më i keq në 20 vjet.
Angola, raportoi mbi 7,500 raste dhe 294 vdekje në 14 provinca nga 7 janari deri më 18 mars, me rreziqe të larta për përshkallëzim të mëtejshëm.
Sipas agjencisë së OKB-së, të dhënat e fundit nga viti 2022 treguan se pothuajse 120 milionë njerëz, përfshirë 60 milionë fëmijë, po pinë ujë të pasigurt në Afrikën lindore dhe jugore, me deri në 22 për qind të popullsisë në rajon që nuk ka fare akses.
Mungesa e shërbimeve adekuate të ujit, kanalizimeve dhe higjienës ka lënë 174 milionë njerëz në rajon pa akses në objektet e higjienës në shtëpi, tha OKB.
“Këto shifra, së bashku me ndikimet në rritje të goditjeve klimatike si përmbytjet e rënda dhe thatësirat, të cilat kanë shkatërruar infrastrukturën kryesore si rezervuarët e furnizimit me ujë dhe tubacionet, dhe kanë shkaktuar varfërimin e burimeve të ujërave nëntokësore, paraqesin një kërcënim në rritje për fëmijët”, tha UNICEF.
Kjo, tha ai, përfshin një rrezik më të lartë të shpërthimeve të sëmundjeve si kolera, e cila tashmë është e pranishme në më shumë se gjysmën e vendeve në rajon.
UNICEF-i u bëri thirrje qeverive dhe palëve të tjera të interesuara në rajon që të kenë prioritet financimin e duhur për të ndërtuar sisteme elastike që mund të përballojnë krizat dhe të sigurojnë akses të vazhdueshëm në ujë të sigurt dhe kanalizime.
Agjencia e OKB-së u kërkoi gjithashtu qeverive që t’u japin përparësi angazhimeve politike në nivelet më të larta për të përmirësuar aksesin në ujë të sigurt dhe kanalizime për fëmijët dhe familjet në nevojë.
