Pas tre barazimesh radhazi, Egnatia më në fund rikthehet te fitorja, duke triumfuar 2-0 ndaj Bylisit në stadiumin “Adush Muça”. Një gol i shënuar nga Lushkja në fillim të pjesës së dytë dhe një tjetër nga Guindo në minutën e 74’ i dhanë skuadrës së Edlir Tetovës një fitore të rëndësishme, e cila e ndihmon të ruajë kreun e renditjes së Superiores.
Që në minutat e para, Bylisi u tregua i rrezikshëm me një tentativë të Ibrahim në minutën e 2’, por goditja e tij përfundoi jashtë kuadratit. Egnatia reagoi në minutën e 9’ me një mundësi të mirë për Lushkjan, i cili nuk u koordinua siç duhet brenda zonës dhe shpërdoroi një rast të artë për të kaluar skuadrën e tij në avantazh.
Në minutën e 37’, Bruno shpëtoi portën e Bylis duke ndalur një gjuajtje të rrezikshme të Fernandos që po shkonte drejt rrjetës. Dy minuta më vonë, rrogozhinasit ishin sërish afër golit kur një goditje e Xhemajlit u devijua nga Ilieski dhe për pak sa nuk përfundoi në portë, me portierin Batista të mbetur i palëvizur.
Egnatia siguron fitoren në pjesën e dytë
Pasi pjesa e parë u mbyll pa gola, Egnatia gjeti rrugën e rrjetës menjëherë pas rifillimit të lojës. Në minutën e 48’, një harkim i saktë i Fernandos gjeti Lushkjan brenda zonës, i cili u koordinua mjaft mirë dhe me një goditje të saktë dërgoi topin në rrjetë, duke i dhënë avantazhin ekipit të tij.
[video width="658" height="360" mp4="https://cdnimpuls.com/lapsi.al/wp-content/uploads/2025/03/67eaa1220afbb.mp4"][/video]
Bylisi u përpoq të reagojë dhe në minutën e 67’ pretendoi për një penallti, por gjyqtari Jorgji nuk ishte i këtij mendimi dhe la lojën të vijonte. Në minutën e 74’, rrogozhinasit shfrytëzuan një kundërsulm të shpejtë, ku Ujka shërbeu për Guindon, i cili me një finalizim të saktë brenda zonës dyfishoi avantazhin dhe vulosi fitoren e Egnatias.
[video width="650" height="360" mp4="https://cdnimpuls.com/lapsi.al/wp-content/uploads/2025/03/67eaa72422d9e.mp4"][/video]
Në minutën e 77’, Bylisi pati një tjetër mundësi me Kameran, por tentativa e tij përfundoi ngjitur me shtyllën, duke i lënë mallakastriotët pa shpresë për të marrë një rezultat pozitiv nga kjo sfidë.
Renditja dhe sfidat e ardhshme
Reagimi i trajnerëve
Pas këtij triumfi, Egnatia kryeson renditjen me 58 pikë, duke u shkëputur me 4 pikë nga Dinamo dhe me 6 nga Vllaznia, që ndodhet në vendin e tretë. Ndërkohë, Bylisi mbetet në vendin e parafundit me 33 pikë, me të njëjtën kuotë pikësh si Skënderbeu dhe Laçi, por në një pozitë delikate në luftën për mbijetesë. I dëshpëruar pas ndeshjes tekniku Gentian Mezani: “Bëmë një pjesë të mirë deri diku, ndoshta nuk patëm raste të shënonim, por as nuk rrezikuam mbrapa. Pësuam një gol shumë të evitueshëm. Lojtarët që u futën në pjesën e dytë nuk dhanë shtysë. Deri diku siç e theksova në pjesën e parë kemi bërë mirë, ndërsa në pjesën e dytë ishte ndryshe".
Lexo më tej: Nga penallti e karton i kuq në simulim: në Shkodër, Vllaznia dhe Teuta ndajnë pikët
Në ndeshjen e radhës, Bylisi do të përballet me Vllazninë, ndërsa Egnatia pret Elbasanin me synimin për të konsoliduar pozitat në krye të tabelës. Mund të jetë i qetë tekniku i rrogozhinasve Edlir Tetova: "Është fundi dhe ndeshje të lehta nuk ka. Kishim pak probleme në pjesën e parë në sulm. Ndërsa në të dytën ishte ndryshe. Tranzicioni pozitiv sot ishte 100% të gjithë djemtë kishin dëshirë të fitonin ndeshjen".
