De Bruyne, lamtumirë Manchester City: do të luajë në skuadrën e qytetit që s'ekziston

Kevin De Bruyne do të përshëndesë Manchester City në fund të këtij sezoni. Mbyllet një aventurë e mbushur me suksese të mëdha, e kurorëzuar me fitoren në Ligën e Kampionëve që kompletoi tripletën historike të Pep Guardiolës – kulmi i një karriere të paharrueshme që e ka bërë belgën një nga më të mirët në botë në rolin e tij. Në moshën 33-vjeçare, ai ka vendosur të hapë një faqe të re dhe e ka bërë të ditur këtë përmes një postimi prekës në Instagram, ku i drejtohet personalisht tifozëve për t’u komunikuar vendimin. “Çdo histori ka një fund, por kjo ka qenë pa dyshim kapitulli më i bukur” – është fraza me të cilën është ndarë, por largimi i tij nuk do të thotë tërheqje nga futbolli. Fantazisti do të vazhdojë të luajë, me shumë gjasa larg futbollit europian, dhe sipas të gjitha gjasave do të përfundojë në Arabinë Saudite – në një qytet që ende nuk ekziston. Bëhet fjalë për Neom, qytet që pritet të themelohet këtë vit dhe që aktualisht ka një skuadër që luan në Serie B të Arabisë Saudite.

Neom, qyteti që nuk ekziston, por ka tashmë një skuadër

Në fakt, qyteti që pritet të mirëpresë belgën sezonin e ardhshëm ende nuk ekziston. Është një projekt i shpallur në vitin 2017 dhe që pritet të konkretizohet këtë vit: Neom do të ndërtohet në provincën Tabuk në Arabinë Saudite dhe bën pjesë në projektin ambicioz “Saudi Vision 2030”, i cili synon gjithashtu zhvillimin e sektorit sportiv të vendit. Pra, qyteti ende nuk është ngritur, por skuadra ekziston, sepse Neom SC nuk është gjë tjetër veçse një rebranding i Al-Suqoor Club – një klub që ka kaluar pjesën më të madhe të historisë së tij në ligat e ulëta të Arabisë Saudite dhe që është i panjohur për publikun e gjerë. Ky klub është zgjedhur për të përfaqësuar vendbanimin e ri urban që ende nuk është inauguruar, por që tashmë ka ekipin e vet të futbollit. Ndryshimi i madh erdhi në vitin 2023, kur Ministria saudite e Sportit njoftoi se klubi do të kthehej në një shoqëri aksionare. Që nga ai moment, klubi ka marrë investime të konsiderueshme, duke u kthyer në ekipin zyrtar të qytetit të Neomit: aktualisht luan në kategorinë e dytë të futbollit saudit, por pritet që ta sigurojë ngjitjen në elitë në fund të këtij sezoni – pikërisht në kohë për të mirëpritur De Bruyne. Aktualisht i zhvillon ndeshjet në shtëpi në Tabuk, por strukturat e tij do të ndërtohen në qytetin futuristik ku janë planifikuar investime për të ngritur infrastrukturë të teknologjisë së lartë. Ashtu si edhe ekipet e tjera të kampionatit saudit, edhe Neom SC do të nisë fushata të mëdha merkatoje për të rekrutuar lojtarët më të mirë në qarkullim, duke synuar të rivalizojë me klubet e mëdha të ligës në vitet e ardhshme.

Dear Manchester. 💙 pic.twitter.com/2EdhVYOLti

— Kevin De Bruyne (@KevinDeBruyne) April 4, 2025