Banorët e Himarës dhe aktivistët mjedisorë janë mbledhur në protestë për të kundërshtuar vazhdimin e punimeve për Ujësjellësin në këtë zonë, projekt i cili po realizohet në shtratin e lumit Vjosë, një nga lumenjtë më të pasur me biodiversitet në Evropë.
Pavarësisht kundërshtimeve të vazhdueshme dhe reagimeve të shumta nga komuniteti, kompania që po realizon punimet ka vazhduar instalimin e tubave, duke shkaktuar shqetësim të thellë për ndikimin mjedisor që ky projekt mund të ketë në Parkun Kombëtar të lumit të egër Vjosa.
Protestuesit kanë ngritur shqetësime të shumta lidhur me ndikimin që ky projekt mund të ketë në ekosistemin e lumit dhe në jetesën e 37 fshatrave që varen nga burimet natyrore të Vjosës.
Për më tepër, banorët e Himarës kanë theksuar mungesën e mbështetjes nga deputetët e zonës, të cilët, sipas tyre, nuk kanë guximin të jenë të pranishëm dhe të mbrojnë interesat e popullit. Ata shprehen të zhgënjyer për faktin që politikanët e zonës nuk janë angazhuar për të mbrojtur një pasuri kaq të vlefshme për Shqipërinë, e cila është pjesë e një ekosistemi unik dhe të pazhvilluar.
"Kemi kontaktuar me institucionet dhe u kemi kërkuar ndihmën e të gjithëve, por më ka habitur diçka: ku janë ata deputetë të popullit që duhet të ishin këtu? A janë ata të popullit, siç e thonë, dhe duhet të ishin këtu me ne? Uji nuk ka ngjyrë, ai është i gjithëve, për të gjithë. Ata nuk vijnë këtu sepse nuk kanë guxim, edhe pse u kemi kërkuar të jenë prezentë"- u shprehën banorët.
Me këtë protestë, banorët e Himarës dhe aktivistët mjedisorë kërkojnë që zëri i tyre të dëgjohet dhe të ndërmerren hapa të shpejtë për mbrojtjen e lumit Vjosë, një thirrje për ruajtjen e natyrës dhe për të siguruar një të ardhme të qëndrueshme për brezat e ardhshëm.
