Milan mposhti 0-4 Udinesen në ndeshjen e parë të javës së 32-të të Serie A, riktheu tri pikët pas dy ndeshjeve dhe përpiqet të mbetet i kapur pas trenit për Europën. Kuqezinjtë, të vendosur nga Conceiçao me skemën 3-4-3, e orientuan ndeshjen në fundin e pjesës së parë me golat e Leao dhe Pavlovic, për ta mbyllur më pas në të dytën me ato të Theo Hernandez dhe Reijnders. Në pritje të ndeshjeve të fundjavës, Milan ngjitet në -1 nga vendi i tetë i zënë nga Fiorentina. Për friulianët, praktikisht pa objektiva në këtë fund sezoni, një humbje shumë e rëndë, e katërta radhazi.
NDESHJA
Milan pati një rast të pabesueshëm pas vetëm 20 sekondash, falë një ngatërrese mes Bijol dhe Kristensen që ia hapi rrugën Reijndersit, por holandezi u ndal nga Okoye dhe humbi mundësinë për 0-1. Kuqezinjtë tentuan ta shtypin Udinesen në gjysmën e saj të fushës, por nuk arritën të krijojnë më rreziqe të mëdha dhe në minutën e 33' vendasit iu afruan avantazhit në kundërsulm: goditja me të djathtën nga këndi e Ehizibue ishte e fuqishme, por Maignan u zgjat dhe largoi rrezikun. Presioni i djemve të Conceiçaos u rrit në minutat e fundit dhe në të 42' ishte Leao që e zhbllokoi: Fofana ia rrëmbeu topin një Lucca-je të pafajshëm, pasoi për portugezin që me një goditje të fuqishme të menjëhershme me të djathtën e dërgoi topin në trekëndësh. Udinese e pësoi goditjen dhe menjëherë para pushimit Milan shënoi edhe 0-2: këndi i Pulisic gjeti kokën e Pavlovic që dyfishoi.
Lexo më tej: Milan nxiton për një drejtor sportiv “fitues”: në garën me D’Amico, Tare ka avantazh
Pjesa e dytë u hap me një frikë të madhe për Maignan pas përplasjes së fortë në ajër me Jimenez, e cila për fat zgjati vetëm disa minuta. Udinese u përpoq të bëhej disi më kërcënuese krahasuar me 45 minutat e para, por loja e friulianëve ishte e ngathët dhe pa zgjidhje reale. Milan pati një mundësi të mirë me Reijnders në minutën e 69' dhe në të 74' e mbylli ndeshjen: i sapohyri Abraham shërbeu në thellësi për Theo Hernandez, i cili pas një vrapimi të zakonshëm të tij shpërtheu një goditje me të majtën në shtyllën e parë, ku Okoye nuk mund të bënte asgjë. Vulen e fundit ia vuri Reijnders në minutën e 81' duke shënuar nga dy hapa larg pas një asistimi të Leao. Milan feston dhe përpiqet të shikojë me besim drejt një fund sezoni ku mund të ketë ende diçka për të thënë.
