Policia njoftoi arrestimin e një 38-vjeçari të quajtur Marin Leka në Lushnjë, i cili dyshohet se ka tentuar të blejë votën e një personi tjetër. Në njoftimin e policisë nuk përmendet Partia Demokratike, por burime policore thanë se oferta kishte qenë për PD, dhe më pas personi që shiti votën ishte penduar dhe më pas kishte kryer denoncimin në komisariat. Sipas njoftimit, pas dorëzimit të kartës së identitetit nga ana e qytetarit të quajtur Muharrem Toska, policia ka ndërhyrë dhe ka ndaluar menjëherë Marin Lekën.
Gjatë kontrollit në banesën e tij, uniformat blu kanë sekuestruar edhe një kartë identiteti që i përket shtetasit Muharrem Toska, një element që tashmë është në fokusin e hetimit nga Prokuroria e Posaçme kundër Korrupsionit (SPAK).
Megjithatë, arrestimi është shoqëruar me një reagim të ashpër nga Partia Demokratike, e cila e konsideron gjithë çështjen një “sajim të turpshëm” të Policisë së Shtetit, duke pretenduar se kjo është një skemë për të manipuluar opinionin publik.
Në reagimin e saj zyrtar, PD thekson: “Sajesat e turpshme si të Sigurimit të Shtetit as na ndikojnë, as na shfokusojnë nga misioni ynë për të bërë më të mirën për Shqipërinë. Ne distancohemi nga çdo krim elektoral dhe jemi në krye të betejës kundër shkeljeve të ligjit në zgjedhje.”
Më tej, demokratët akuzojnë qeverinë se ka kapur institucionet për t’i përdorur si armë propagandistike në fushatë: “Manipulimet e opinionit publik të kryer nga Policia e Shtetit, një bandë në shërbim të Belinda Ballukut, duhet të marrin përgjigje nga Prokuroria e Posaçme. SPAK duhet të hetojë menjëherë rastin dhe të vendosë para përgjegjësisë cilindo që ka shkelur ligjin.”
Duke theksuar besimin ndaj SPAK-ut për zbardhjen e së vërtetës, PD nënvizon: “Ne kemi besim të plotë tek SPAK për zbardhjen e këtij rasti, ku po keqpërdoret Policia e Shtetit për propagandë bajate kundër PD.”
Në përfundim, deklarata përmend edhe përpjekjet e mazhorancës për të shmangur vëmendjen nga krimet elektorale të saj, sidomos përfshirjen e administratës publike në fushatë: “Sajesa e trashë, qesharake dhe e turpshme e Policisë së Shtetit është bërë për llogari të PS dhe Belinda Ballukut për të zhurmuar krimin elektoral të detyrimit të administratës për të marrë pjesë në mitingjet e PS. 35 fletëthirrje janë dërguar tek strukturat e Partisë Socialiste për krime zgjedhore vetëm ditën e djeshme për këtë krim elektoral. Ne inkurajojmë Prokurorinë e Posaçme që të vijojë punën për goditjen e çdo krimi zgjedhor në qarkun Fier.”
