Një histori speciale e Champions League mund të shkruhet në Villa Park të martën në mbrëmje, ku Aston Villa synon të kompletojë një përmbysje magjepsëse kundër Paris Saint-Germain në ndeshjen e dytë çerekfinale. Kampionët e Ligue 1 udhëtojnë përtej Kanalit Anglez me një avantazh 3-1 nga përballja e parë, por siç e di mirë Unai Emery, parisienët janë të prirur ndaj katastrofave në ndeshjet e kthimit.
Aston Villa - PSG
Pasi shfaqi aftësitë e tij si komentator përkrah Ally McCoist dhe Rio Ferdinand, Lartësia e Tij Mbretërore Princi William mori vendin e tij në Parc des Princes, ku skuadra e tij e dashur, Villa, e çoi trashëgimtarin e fronit britanik në ekstazë me golin e Morgan Rogers në shtyllën e dytë. Megjithatë, në një mbrëmje ku talentet e rinj sulmues shkëlqyen në kryeqytetin francez, dy goditje të jashtëzakonshme nga Desire Doue dhe Khvicha Kvaratskhelia e përmbysën ndeshjen, përpara se PSG të jepte goditjen përfundimtare me golin e Nuno Mendes në minutën e 92'.
Një disavantazh 3-1 ende nuk është i pakapërcyeshëm, por diferenca mes një dhe dy golave në Champions mund të jetë dita me natën, dhe Aston Villa është eliminuar në të dy rastet e mëparshme kur ka humbur ndeshjen e parë të një dueli me eliminim direkt me dy ose më shumë gola. Udhëtimi i “Luanëve” te Southampton, tashmë të rënë nga kategoria, në fundjavë ishte gjithashtu i sikletshëm për 70 minutat e para, përpara se golat nga Ollie Watkins, John McGinn dhe Donyell Malen t’i jepnin Aston Villa një fitore motivuese 3-0, që shpëtoi Marco Asensio nga turpi, pasi humbi dy penallti ndaj Aaron Ramsdale.
Lexo më tej: Video e Luis Enrique në dhomën e zhveshjes: kjo shpjegon transformimin e PSG
Villians mbetet në garë për t’u kualifikuar në Champions 2025-26 përmes pozicionit në Premier League, dhe tani rikthehet në një stadium ku nuk është mposhtur në 17 ndeshjet e fundit në të gjitha kompeticionet, një nga disa statistika pozitive për Villa Park. Në fakt, Villa ka fituar katër ndeshjet e fundit në shtëpi, ka shënuar të paktën dy gola në shtatë nga tetë ndeshjet e fundit para tifozëve të saj, dhe Emery ka fituar 11 nga 13 ndeshjet e fundit në shtëpi në Europë. Thënë thjesht, PSG nuk duhet të marrë asgjë si të mirëqenë.
PSG e tjetërsuar e Luis Enrique
Një skuadër e rilindur që nga fillimi katastrofik i fazës së grupeve në Champions – ku për pak sa nuk u eliminuan herët – tani flitet seriozisht për PSG-në si favorite për lavdi kontinentale këtë verë, nëse arrin të shmangë rënien në zakonet e vjetra. Kanë kaluar thuajse tetë vite që nga remontada e famshme e Barcelonës ndaj PSG-së së drejtuar nga Emery, dhe nga shtatë rastet kur PSG ka fituar ndeshjen e parë të një dueli me dy gola a më shumë diferencë, është eliminuar në tre prej tyre. Asnjë skuadër nuk është eliminuar katër herë në të tilla raste, por ndjesia për këtë version të PSG-së është ndryshe, pasi Luis Enrique dhe Luis Campos kanë harmonizuar një grup të ri pas dështimeve të epokës “galaktike”.
Ndryshe nga Villa, parizienët patën luksin e një fundjave pa ndeshje kampionati, edhe pse tashmë kishin siguruar titullin në Ligue 1 për sezonin 2024-25 me gjashtë ndeshje për të luajtur dhe mund të përmbyllin sezonin pa humbje në kampionat. Megjithëse Arsenal dhe Bayern Munich e kanë mposhtur PSG-në këtë sezon jashtë fushe, skuadra e Enrique ka fituar plot 16 ndeshje radhazi jashtë fushe në të gjitha garat – përfshirë kualifikimin me penallti kundër Liverpool – por edhe nëse kjo seri ndalet në Midlands, ata mund të festojnë sërish.
Borussia Dortmund - Barcelona
Duke pasur nevojë për t’i shërbyer Barcelonës me një “remontadë” të vetën për të mbetur në garë në Champions, Borussia Dortmund pret gjigantët katalanas të martën në ndeshjen e kthimit të çerekfinaleve në Signal Iduna Park. Skuadra e Bundesligës u shkatërrua 4-0 nga ekipi i Hansi Flick javën e kaluar, teksa “La Blaugrana” e vendosi njërën këmbë në gjysmëfinale ku mund të përballet me Interin ose Bayernin.
Treshja sulmuese e Lionel Messi–Neymar–Luis Suarez në Barcelonë mund të mbahet mend përgjithmonë si një nga më të frikshmet në histori, por Raphinha, Lamine Yamal dhe Robert Lewandowski po e rivalizojnë seriozisht atë. Të tre sulmuesit e Flick shkëlqyen në ndeshjen e parë: Lewandowski shënoi dy herë kundër ish-ekipit të tij, ndërsa Raphinha dhe Yamal kompletuar fitoren – me brazilianin që barazoi rekordin e Messit për më shumë kontribute në gola në një sezon të vetëm të Ligës së Kampionëve (19).
Dortmund e misioni i pamundur
Ndërsa tifozët e Barçës festonin, ata të Dortmund ndoshta i jepnin lamtumirë ëndrrës për të shkuar më tej se sezoni 2023-24, pasi në 159 raste kur një skuadër ka humbur me katër gola ose më shumë në ndeshjen e parë të një faze me eliminim direkt në UCL, vetëm një herë ka përmbysur – Barcelona kundër PSG-së në 2017. Duke marrë parasysh paqëndrueshmërinë e thellë të Dortmund këtë sezon, është thuajse e pamundur të imagjinohet që skuadra e Niko Kovac do të përsërisë mrekullinë katalanase të martën.
BVB të paktën ruajti dinjitetin të shtunën në “Klassiker”-in e Bundesligës kundër Bayernit, duke barazuar 2-2 në Allianz Arena, por ka vetëm tre fitore në 12 ndeshjet e fundit në Signal Iduna Park, ku muret po shemben. Kjo seri e dobët përfshin edhe humbjen 3-2 nga Barcelona në fazën e grupeve, një nga gjashtë ndeshjet radhazi pa fitore të Dortmund ndaj katalanasve në Europë.
Lexo më tej: Çfarë Parisi me Doué, Kvara e Mendes, përmbys Aston Villa: Barcelona thërmon Dortmund
Vetëm kundër Rangers (shtatë ndeshje nga 1996 në 1999) Dortmund ka pasur një ecuri më të keqe në Evropë, por nga seritë e zeza te ato historike, Barcelona po shijon ecurinë më të gjatë pa humbje në fillim të një viti kalendarik. Fitorja 1-0 ndaj Leganes të shtunën në La Liga nënkupton se “Blaugrana” nuk kanë humbur asnjë nga 24 ndeshjet e vitit 2025, dhe Flick është në rrugë të mbarë për të kompletuar një katërshe spektakolare – janë të shkëputur në La Liga, luajnë finalen e Kupës së Mbretit më 26 prill kundër Real Madridit dhe kanë fituar tashmë Superkupën e Spanjës.
Barça e frikshme edhe në transfertë
Për të rritur më tej entuziazmin e tifozëve të Barçës, skuadra e tyre është në kërkim të fitores së nëntë radhazi jashtë fushe në Signal Iduna Park, dhe nuk ka humbur asnjë nga 16 ndeshjet e fundit larg shtëpisë – hera e fundit ishte më 10 nëntor ndaj Real Sociedad. Me dy fitore ndaj Dortmund dhe një “shkatërrim” 4-1 ndaj Bayern këtë sezon, Barça ka fituar tri ndeshjet e fundit në UCL ndaj skuadrave gjermane, pasi kishte humbur pesë të mëparshmet – një tregues i ndryshimit të balancave, teksa Flick synon të përmbushë rolin e favoritit.
