Detaje të reja janë zbardhur në lidhje me plagosje me armë zjarri në një lokal në Tiranë mbrëmjen e së mërkurës (16 Prill), ku një person u qëllua me armë dhe u dërgua në një spital privat në Tiranë pas ngjarjes. Bëhet e ditur se shtatë persona kanë qenë të ulur së bashku në një tavolinë brenda restorantit te rruga “Sami Frashëri” dhe dy prej tyre pasi kanë debatuar kanë goditur njëri-tjetrin.
Gjithashtu bëhet e ditur se njëri prej tyre i ka dhënë dorën të gjithë personave në tavolinë, ndërsa personi tjetër ka refuzuar duke e ofenduar dhe më pas sherri ka degraduar në konflikt fizik dhe me karrige. Gjatë sherrit është qëlluar edhe me armë zjarri, ndërsa personat e përfshirë më pas janë larguar me katër makina me shpejtësi të gjithë nga vendi i ngjarjes për t’i shpëtuar policisë. Gjithashtu dyshohet se përplasja mes tyre ka ndodhur për paratë me fajde.
Më pas policia ka shkuar në restorantit ku ndodhi konflikti dhe ka konstatuar një gëzhojë dhe njollat e gjakut, po ashtu ka sekuestruar edhe armën e zjarrit tip pistoletë e cila ishte lënë brenda në restorant nga autori, pasi dyshohet që gjatë përleshjes fizike i ka rënë në tokë. Ndërkohë arma është dërguar ne laborator për t’u bërë ekspertiza për të zbuluar ADN dhe shenjat e gishtave.
