Dy persona janë arrestuar në Fushë-Krujë dhe Dibër, të cilit ishin shpallur në kërkim ndërkombëtar nga Italia, si pjesë e organizatave kriminale.
Në vijim të operacioneve të njëpasnjëshme të zhvilluara nga Drejtoria e Forcës së Posaçme Operacionale, brenda 12 orëve të fundit janë finalizuar dy faza të tjera të operacionit policor të koduar “Operacionalja”, duke arrestuar Klodian Llomi (Mazari), 34 vjeç, banues në Maqellarë, Dibër dhe Roland Ibrahimi, alias Ali Meci, 40 vjeç, banues në Laç.
Gjykata e Apelit Romë, në vitin 2023, e ka dënuar Llomin me 6 vjet, 7 muaj e 2 ditë burg, për veprat penale “Organizatë kriminale”, “Trafikim i lëndëve narkotike” dhe “Shfrytëzim prostitucioni”, të parashikuara nga Kodi Penal Italian.
Nga ana tjetër, Ibrahimi është dënuar nga Gjykata e Torinos, në vitin 2024 me 4 vjet e 3 muaj burg, për veprat penale “Organizatë kriminale”, “Grup kriminal”, dhe “Vjedhje e rëndë”, të parashikuara nga Kodi Penal Italian.
Operacioni vijon për kapjen e personave të tjerë të shpallur në kërkim ndërkombëtar dhe kombëtar.
