Kryetari i Komisionit të Prokurimit Publik, Jonaid Myzyri, është paraqitur sërish në SPAK, ku ka qëndruar për afro tre orë nën pyetjet e prokurorëve të posaçëm. Zyrtari i afërt me Belinda Ballukun, edhe kësaj here, zgjodhi të mos japë asnjë koment për mediat në lidhje me statusin e tij në këtë hetim apo për çështjen konkrete për të cilën u mor në pyetje.
Kjo shënon herën e tretë që Myzyri thirret nga Prokuroria e Posaçme, ndërsa burime pranë hetimit bëjnë me dije se seanca e fundit lidhet me dyshimet për përfshirjen e tij në abuzime me tenderat publikë.
Hetimet e SPAK fokusohen mbi procedurat e prokurimeve gjatë periudhës 2020-2023, me dyshimin se tenderat janë zhvilluar në mënyrë të parregullt, shpeshherë pa garë reale. Në një numër të konsiderueshëm rastesh, fituese ka rezultuar vetëm një kompani, ndërsa në të tjera, ofertuesit janë skualifikuar në mënyrë të dyshimtë.
Në kuadër të këtyre hetimeve, SPAK ka vendosur edhe sekuestrimin e disa procedurave të dyshuara, ndërkohë që Kontrolli i Lartë i Shtetit, pas një auditimi të kryer, ka konstatuar se dëmi ekonomik i shkaktuar nga këto abuzime me tenderat arrin në rreth 2 miliardë e 550 milionë euro.
Megjithatë, edhe pse faktet rëndojnë gjithnjë e më shumë, Jonaid Myzyri vijon të mbajë të njëjtin qëndrim: heshtje absolute para kamerave.
