Cristiano Ronaldo as këtë vit nuk do ta fitojë Saudi Pro League, në përpjekjen e tij të tretë që nga transferimi te Al Nassr në fillim të vitit 2023, por do të ketë mundësinë të provojë sërish në dy vitet e ardhshme me të njëjtën skuadër, pasi ka rinovuar kontratën me klubin nga Riadi për një shifër marramendëse: 400 milionë gjithsej, që do të thotë pak më shumë se gjysmë milioni në ditë. Ronaldo ka një familje të madhe, dhe tani që ka mbushur 40 vjeç (në shkurtin e kaluar), duhet të mendojë për pleqërinë – të lësh diçka mënjanë është gjë e mirë dhe e drejtë. Por koprac nuk është, përkundrazi, dhe këtë e dëshmon një episod i ndodhur disa vite më parë në Greqi, pas qëndrimit në një resort që e kishte lënë veçanërisht të lumtur për shërbimin e marrë.
Cristiano Ronaldo e pushimet në resortin grek Costa Navarino
Ishte viti 2018, një Ronaldo 33-vjeçar kishte organizuar një pushim super luksoz së bashku me rrethin e tij të ngushtë në resortin grek Costa Navarino, një pesë yje ëndrrash në Peloponez. Duhet të ketë qenë një qëndrim i mrekullueshëm, jo vetëm për bukurinë e plazheve dhe peizazhit, por edhe për mënyrën se si pesë herë fituesi i Topit të Artë ishte trajtuar nga stafi i hotelit.
Bakshishi i madh që CR7 la për stafin e hotelit
Kampioni portugez, në momentin e largimit, vendosi të shpërblente në mënyrë të përshtatshme ata që e kishin bërë pushimin e tij kaq të paharrueshëm: ai la për stafin e resortit një bakshish të çmendur (për njerëzit e zakonshëm) prej gjithsej 20 mijë euro, duke shtuar vetëm një kërkesë. Që stafi që ishte kujdesur për të të ndante bakshishin në mënyrë të barabartë: “Dhjetë punonjësit e ngarkuar për t’i shërbyer familjes së Ronaldos dhe për t’i mbajtur larg paparacëve morën nga dy mijë euro secili”, kishin pohuar asokohe mediat greke.
Lexo më tej: Cristiano Ronaldo me pushime, bakshishet e majme për stafin e tij
Jeta luksoze e CR7 me partneren Georgina
Cristiano kishte shkuar në resortin Costa Navarino pas eliminimit të hershëm të Portugalisë nga Botërori i vitit 2018 (humbje me Uruguain në të tetat e finales) dhe kishte kaluar dhjetë ditë aty me familjen dhe miqtë. “Ishte një nder dhe një përvojë e mrekullueshme të kujdeseshim për Cristiano Ronaldon dhe familjen e tij – kishte shkruar atëkohë stafi i resortit – Një falënderim i madh për Cristianon që bëri pjesë të historisë sonë.” Dhe gjithashtu për bakshishin që la…
