Një episod i shëmtuar dhe i neveritshëm ndodhi në Angli të shtunën e Pashkëve gjatë ndeshjes mes Old Malton St Mary’s dhe Malt Shovel në Premier Division të York Football League, një kampionat amator që ndodhet në nivelin e njëmbëdhjetë të piramidës së futbollit anglez: arbitri gjeti jashtëqitje në këpucën e tij gjatë pushimit të një ndeshjeje në të cilën kishte dhënë një penallti të diskutueshme. Pas këtij incidenti, gjyqtari vendosi të ndërpresë ndeshjen.
Ndeshja kishte qenë shumë e luftuar në pjesën e parë: vendasit e Old Malton kishin kaluar në epërsi falë një penalltie që ishte kundërshtuar fort nga kundërshtarët. Më pas, skuadra e Shovel, që kryeson renditjen, e kishte përmbysur rezultatin, duke shkuar në pushim me shifrat 2-1.
Arbitri gjen jashtëqitje në këpucën e tij
Ishte pikërisht në atë moment që arbitri, teksa kthehej në dhomën e tij të zhveshjes, kuptoi se dikush kishte hyrë para tij dhe kishte defekuar në njërën prej këpucëve të tij të zeza sportive Nike. Megjithëse autori nuk u identifikua, arbitri e ndërpreu dhe më pas e anuloi ndeshjen, duke përmendur shqetësimet për sigurinë e tij personale. Federata e Futbollit North Riding, që mbikëqyr York League, është duke hetuar rastin përpara se të vendosë për ndonjë masë ndëshkimore.
Lexo më tej: Arbitri si Bruce Lee, shqelm në kraharor trajnerit protestues: në fushë hyn policia
Klubet mund të gjobiten ose të penalizohen në renditje nëse zbulohet se ndonjë pjesëtar i stafit apo ndonjë tifoz i tyre ishte i përfshirë në këtë akt të turpshëm. Të shtunën e kaluar, Old Malton publikoi një postim në faqen e vet në Facebook ku njoftonte se ndeshja ishte ndërprerë gjatë pushimit “për shkak të një incidenti jashtë fushës”.
Adam Newell, që merret me mirëmbajtjen e stadiumit të Malton, shkroi në X (ish-Twitter): “Eh mirë, në të gjitha ditët që kam pasur të bëj me futbollin, jam mbetur pa fjalë nga veprimet e disa individëve. Ndeshja jonë u ndërpre gjatë pushimit sepse kur arbitri hyri në dhomën e zhveshjes, dikush kishte (emoji i jashtëqitjes) në këpucët e tij sportive. Vërtet po pyes veten çfarë mentaliteti kanë këta njerëz.”
