Mbajtja e Ndicka ndaj Bisseck ka shkaktuar zemërim të madh te lojtarët e Interit dhe te publiku i San Siros, i cili shpërtheu në një buçitje protestash. Ata kërkuan një penallti kundër Romës, por as arbitri Fabbri dhe as VAR-i nuk e konsideruan të arsyeshme ta akordonin. Gjyqtari kishte mbajtur të njëjtin standard gjykimi edhe në dy episode të mëparshme ku protagonist kishte qenë Dumfries: në të dy rastet ishte akorduar faull ndaj holandezit, duke shtuar pakënaqësinë dhe zemërimin.
Kontakti mes mbrojtësit të Romës dhe atij të Interit ndodhi në fund të ndeshjes, kur skuadra e Simone Inzaghit ishte e përqendruar në sulm në kërkim të barazimit. Duke qenë në disavantazh prej një goli nga magjia e Soulé, Interi kishte shteruar të gjitha energjitë për të paktën të mos humbur. Në një nga sulmet e fundit ndodhi “ngjarja”, të paktën sipas zikaltërve: Bisseck rrëzohet pak metra larg vijës së portës, pasi kishte tentuar të çlirohej nga markimi “i ngushtë” i Ndicka. Kundërshtari e kontrollon me shumë përvojë, duke rrezikuar shumë, dhe i del mirë sepse ajo ndërhyrje duket me të vërtetë në limit: Fabbri lë lojën të vazhdojë, nga dhoma e VAR-it nuk ka ndërhyrje. “Kemi mungesa, rimënie anësore, penallti. Nuk ka nevojë të flasim…”, ishin fjalët e trajnerit në fund të ndeshjes.
Ish-arbitri Luca Marelli e ka vlerësuar negativisht këtë vendim të gjyqtarit, që ka lënë shumë të habitur. Duke e rishikuar aksionin në slow motion, ai ka vënë re diçka dhe ka shpjeguar pse, sipas tij, do të kishte qenë e drejtë të sanksionohej ajo “kujdesje” nga ana e mbrojtësit të Romës që përpiqet me çdo mënyrë ta ndalojë kundërshtarin: “Mbajtja e N’Dicka fillon shumë përpara se topi të arrijë në zonën e Bisseck – ishin fjalët e ish-gjyqtarit për DAZN. – Në këto raste duhet marrë parasysh një aspekt: nëse lojtari është në avantazh, pra Bisseck, ndihmon vetveten me duar duke mbajtur. Në këtë rast nuk ka asnjë ndihmë nga ana e Bisseck që mbahet. Mbrojtësi i Interit nuk bën asgjë, por ndalet në mënyrë të dukshme, kjo është penallti dhe VAR-i mund të kishte ndërhyrë dhe të mos e linte vendimin në fushë”.
Të njëjtin mendim ndau edhe Stramaccioni, i cili komentoi kështu atë moment vendimtar: “N’Dicka e përqafon Bisseck që nga fillimi dhe, mbi të gjitha, nuk ka asnjëherë mundësi të ndërhyjë te topi. Sipas mendimit tim, kjo është penallti në 9 raste nga 10. Ka pasur fat që Fabbri e vlerësoi ndryshe…”.
