Janë publikuar shpjegimet e para zyrtare mbi arsyet që shkaktuan ndërprerjen masive të energjisë elektrike në Spanjë dhe Portugali të hënën e 28 prillit. Sipas operatorit spanjoll të rrjetit të transmetimit të energjisë elektrike REE (Red Electrica de Espana), pati dy defekte.
Në orën 12:33, rrjeti pati një goditje të parë, por pothuajse menjëherë u stabilizua.
Megjithatë, pas 1 sekonde e gjysmë, ndodhi një "ngjarje" e dytë, e ngjashme me të parën. 3.5 sekonda më vonë paqëndrueshmëria shkaktoi shkëputjen e lidhjes elektrike midis Spanjës dhe Francës, domethënë me pjesën tjetër të rrjetit evropian.
Operatori i rrjetit nuk e zbuloi dot origjinën e dy “ngjarjeve”, pra se çfarë i shkaktoi ato. REE foli për një “lëkundje të fortë në rrjedhën e energjisë”, e cila shkaktoi “një humbje shumë të konsiderueshme të gjenerimit”. Kjo humbje e gjenerimit tejkaloi kapacitetin e sistemeve të energjisë elektrike për t'u përballuar dhe rrjeti spanjoll u shkëput nga sistemi evropian. Sistemi elektrik më pas u shemb, duke shkaktuar humbje të tensionit në pikat e energjisë në rrjetet spanjolle dhe portugeze.
Ajo që pranoi Ree është se shkaku i dy "ngjarjeve" që çuan në shembjen e sistemit duhet kërkuar në juglindje të gadishullit, në rajonin e Extremadurës. Ky është një nga territoret që gjeneron më shumë energji elektrike, falë pranisë së centraleve hidroelektrike dhe diellore dhe nga centralet bërthamore më të fuqishmit të vendit. Kreu i REE tha se "është e mundshme" që shkaku i asaj që ndodhi qëndron në sistemet fotovoltaike.
Kryeministri portugez Luis Montenegro tha se nuk kishte asnjë shenjë të një sulmi kibernetik, por të dy vendet po shqyrtonin ende të gjitha hipotezat. Gjithashtu janë përjashtuar incidente të tjera si një zjarr ose një ndryshim i menjëhershëm i temperaturës që u hipotetizuan ditën e ndërprerjes së energjisë.
Problemi duket të jetë mbiprodhimi i energjisë diellore, që iu bashkua një problemi të balancimit të sasisë së energjisë së futur në rrjet dhe asaj të absorbuar nga kërkesa e konsumatorit. Përgjigja përfundimtare, sipas operatorit spanjoll të rrjetit, do të vijë vetëm kur të dhënat nga qendrat e prodhimit të energjisë të bëhen publike. ©LAPSI.al
