Në gati katër vite te PSG ka fituar gjithçka në Francë, por shpesh dhe me dëshirë ka përfunduar në shënjestrën e kritikëve për ndonjë gabim të tepërt. Gigio Donnarumma, megjithatë, nuk është dorëzuar kurrë, ka vazhduar të punojë fort dhe me pritjet e tij të jashtëzakonshme pothuajse e ka çuar PSG-në në finalen e Champions League. Ende mbetet për t’u luajtur sfida e kthimit, por nëse dje PSG nuk pësoi gol kundër Arsenalit është mbi të gjitha falë tij, për dy ndërhyrjet e jashtëzakonshme ndaj Martinellit në pjesën e parë dhe ndaj Trossard në pjesën e dytë.
ANGLIA E SHNDËRRON NË SUPERHERO
Në anën tjetër të Kanalit, portieri i Kombëtares shndërrohet dhe jep maksimumin: këtë e dinë mirë tifozët anglezë, të cilët dolën me kokën ulur nga Wembley pas finales së Euro 2020, por edhe ata të Liverpool dhe Aston Villa, ambiciet evropiane të të cilëve u fundosën nga mrekullitë e Gigios.
Në Anfield, Donnarumma kreu dy ndërhyrje vendimtare ndaj Luis Diaz dhe Szoboszlai gjatë kohës së rregullt, përpara se të hipnotizonte në lotarinë e penalltive Darwin Nunez-in dhe Jones-in. Në fund të ndeshjes, ai mori çmimin e merituar MVP nga UEFA, por dha edhe një përgjigje të prerë ndaj sulmeve për golin e pësuar në ndeshjen e parë nga Elliott: “Shoh shumë kritika nga disa, nëse mund t’i quajmë gazetarë. Flasin pa ditur se çfarë është profesioni i portierit – ishte shfryrë ai. – Në ndeshjen e parë pësuam një goditje në portë dhe një gol dhe menjëherë mendojnë se është faji im. Por unë buzëqesh, punoj dhe përpiqem të ndihmoj skuadrën.”
Lexo më tej:Dembélé fantastik, PSG triumfon në Londër: Arsenal pranë shembjes nga Barcola e Ramos
Edhe më i jashtëzakonshëm në ndeshjen e kthimit të çerekfinaleve në Birmingham, me tre mrekulli të vërteta ndaj Rashford, Tielemans dhe Asensio, që konfirmuan se mes shtyllave ai është më i miri në botë.
NJË SEZON I NJOLLOSUR ME GAFA
Por ky sezon nuk ka qenë i gjithi me diell. Pikërisht në fazën e grupeve të Champions League ndaj Arsenal, Donnarumma preku pikën më të ulët, me një dyfish gafash në golat e Havertz dhe Saka. Më pas, në fund të nëntorit kundër Bayern Munich, erdhi edhe pankina e parë në Champions për arsye teknike: Luis Enrique i dha përparësi Matvey Safonov sepse ishte më i mirë me topin në këmbë, por portieri rus nuk ia shpërbleu besimin, duke u bërë protagonist negative, duke kthyer një goditje këndi të thjeshtë në asist për Kim. Një humbje, që me retrospektivë ndryshoi për mirë ecurinë evropiane të PSG-së: Donnarumma u rikthye në portë, i la kritikat të rrëshqisnin mbi vete dhe u bë njeriu më i rëndësishëm në marshimin e parisienëve.
NJË LIDER ME KONTRATËN DREJT FUNDIT
Në vetëm 26 vjeç, Donnarumma është një pikë referimi në dhomën e zhveshjes së PSG-së, siç e tregoi gjesti i Vitinha: portugezi, i shpallur MVP nga UEFA kundër Arsenal, publikoi në fund të ndeshjes një foto në rrjetet sociale ku pozonte bashkë me ish-lojtarin e Milan duke mbajtur në dorë trofeun e vogël dhe duke shtuar një mbishkrim më shumë se simbolik: “MVP i vërtetë.” Edhe tifozët në rrjete sociale po e lavdërojnë me të drejtë, dëshmi e qartë se në botën e futbollit është çast puna për të kaluar nga yjet në baltë dhe anasjelltas.
Mbetet, më pas, çështja e rinovimit të kontratës që skadon në qershor 2026: palët po flasin prej kohësh, por negociatat janë në ngërç. Kush e di nëse pas këtyre mrekullive të fundit, PSG nuk do t’i japë një shtysë të shpejtë bisedimeve. Edhe sepse të humbësh një Donnarumma të tillë do të ishte autogoli më i bujshëm i mundshëm.
