Zvonimir Boban analizoi barazimin e Inter në fushën e Barcelonës në gjysmëfinalen e parë të Champions League. Ish-futbollisti dhe drejtuesi i Milan, në studion pas ndeshjes në Sky Sport, deklaroi: “Një ndeshje spektakolare, e jashtëzakonshme. Kur rezultati ishte 0-2 dhe duke parë si po luante Barcelona, Capello më tha se do të përfundonte 3-3. Nuk e qëllon gjithmonë, por ai e tha kur ishte ende 0-2.”
Skuadra e teknikut Simone Inzaghi zhvilloi një ndeshje me shumë guxim përballë një kundërshtari shumë të fortë dhe arriti të nxjerrë një paraqitje të jashtëzakonshme, që e lë gjithçka të hapur për ndeshjen e kthimit për kualifikimin në finale.
Boban: “Inter mund ta kishte fituar”
Boban foli për fazën mbrojtëse të Barcelonës dhe lavdëroi Lamine Yamal: “Barcelona mbrohej në mënyrë ‘zemaniane’, Inter ishte shumë i mirë, por është e vështirë të mbrohesh me një Yamal të tillë përballë. Pjesa e dytë ishte shumë më e ekuilibruar si lojë, ndërsa në të parën Barcelona ishte më dominuese. Një ndeshje shumë e bukur, e luajtur mirë nga të dyja skuadrat. E kishim ‘varrosur’ para kohe Yamal (qesh, red.)”.
Në fund, ish-drejtuesi i UEFA-s tha fjalë të rëndësishme për Inter, por edhe një paralajmërim në prag të sfidës së kthimit: “Inter pati shumë raste potenciale në pjesën e dytë. Gaboi në pasimin e fundit, por me pak më shumë saktësi mund ta kishte fituar ndeshjen. Gjithsesi pamë se çfarë është në gjendje të bëjë Barcelona në pjesën e parë, ndërsa në të dytën për mua ndeshja ishte më e ekuilibruar. Besoj se në San Siro Barcelona do të luajë si Barcelona për 90 minuta”.
Lexo më tej: Mkhitaryan e goli i anulluar për një 'majucë': “Do të më mbetet peng gjithë jetën”
Boban e kishte paralajmëruar Barcelonën edhe në çerekfinalen e parë kundër Borussia Dortmund: në atë rast katalanasit fituan 4-0 dhe praktikisht siguruan kualifikimin për në gjysmëfinale, por lanë shumë hapësira për gjermanët. “Po të kishte luajtur Inter sonte, do t’i kishte shënuar 3 gola…”, kishte thënë ish-mesfushori kroat — dhe fati deshi që kështu të ndodhte në raundin e parë mes zikaltërve dhe Barcelonës.
