Java e 35-të e Premier League nisi me një tjetër fitore të rëndësishme për Manchester City, në suksesin e katërt radhazi në kampionat. Skuadra e Guardiolës mposhti 1-0 Wolverhampton në ndeshjen hapëse të zhvilluar në “Etihad” dhe rikthehet në vendin e tretë, të paktën për dy netë, në pritje të përgjigjes së Newcastle (që luan të dielën). Vendosi ndeshjen goli i De Bruyne në minutën e 35' të pjesës së parë, pas asistit të Doku: Citizens janë tani -3 nga Arsenal.
Në seri pozitive që nga mesi i marsit, Manchester City priti në Etihad Wolverhampton, skuadrën më në formë të Premier League: Wolves kishin fituar gjashtë ndeshje radhazi, me humbjen e fundit në kampionat që daton në fund të shkurtit. Pikërisht “Ujqërit” e Vitor Pereira u bënë shumë të rrezikshëm në minutën e 28' me Aït-Nouri, duke shkuar vetëm pak centimetra larg avantazhit. Por golin e 1-0 e gjeti City në minutën e 35', falë tandemit belg Doku-De Bruyne: i pari dha asistin, i dyti mposhti Sá dhe kaloi vendasit në epërsi.
Lexo më tej: The Times: “Jo vetëm City, edhe një tjetër gjigant rrezikon përjashtimin nga kupat”
Më pak fat ka Matheus Cunha në minutën e 57', pasi goditja e tij për golin e barazimit përfundoi në shtyllë. Një çerek ore para fundit, Aït-Nouri rrezikoi një karton të kuq për një ndërhyrje të keqe ndaj Bernardo Silva: arbitri vendosi megjithatë të falë mbrojtësin franko-algjerian. Loja vazhdoi kështu njëmbëdhjetë kundër njëmbëdhjetë, me City që arriti të mbrojë epërsinë 1-0 deri në vërshëllimën përfundimtare. Bluve të Mançesterit i shkon kështu fitorja e katërt radhazi dhe ngjiten në kuotën e 64 pikëve: Citizens e rimarrin – të paktën për momentin – vendin e tretë, në pritje të përgjigjes së Newcastle (që luan të dielën ndaj Brighton). Ndërpritet, ndërkohë, seria e gjashtë fitoreve radhazi për Wolverhampton, që mbetet me 41 pikë dhe rikthehet në shënjestrën e Manchester United dhe Everton.
