Vllaznia siguron finalen e madhe të “Final 4” pas një përballjeje dramatike ndaj Dinamos. Skuadra e Brdaric është bërë finalistja e parë e edicionit 2024/25 në fazën përmbyllëse të kampionatit, të njohur si “Final 4”. Shkodranët siguruan një fitore të rëndësishme 2-1 në “Arenën Kombëtare” përballë Dinamos, duke hedhur një hap të madh drejt titullit kampion.
Ndeshja nisi me intensitet të lartë dhe ritëm të shpejtë, ku të dyja skuadrat kërkuan që në minutat e para të vendosnin autoritetin e tyre në fushë. Pjesa e parë rezultoi e mbushur me emocione dhe polemika, veçanërisht për shkak të vendimeve të arbitrave. Gjyqtari Enea Jorgji akordoi tre penallti në total, dy prej të cilave në favor të Vllaznisë, të cilat u shndërruan në gol nga sulmuesi Bekim Balaj. Ndërkohë, një 11-metërsh i dhënë fillimisht për Dinamon u anulua pas ndërhyrjes së VAR-it, çka shkaktoi protesta nga lojtarët dhe stafi teknik i bluve. Falë dy realizimeve të Balajt nga pika e bardhë, kuqeblutë shkuan në pushimin mes pjesëve me epërsi të dyfishtë, duke marrë një avantazh të rëndësishëm psikologjik.
[video width="662" height="360" mp4="https://cdnimpuls.com/lapsi.al/wp-content/uploads/2025/05/6817b25cbab97.mp4"][/video]
Lexo më tej: Tirana mbijeton falë autogolit në minutën e 90’: Hysenllari shpëton Shkëmbin e Memën
Në pjesën e dytë, panorama e lojës ndryshoi tërësisht. Dinamo u hodh në sulm dhe mori kontrollin e ndeshjes, duke e mbajtur Vllazninë tërësisht në gjysmëfushën e saj. Vetëm pak minuta pas rifillimit të lojës, ishte Mandela Itodo që ngushtoi diferencën me një gol të shpejtë, duke i rikthyer shpresat te ekipi kryeqytetas. Megjithatë, pavarësisht presionit të pandërprerë dhe disa rasteve të rrezikshme, Dinamo nuk arriti të konkretizojë, duke u përplasur shpesh me një Vllazni të përqendruar në mbrojtje dhe me pritjet vendimtare të portierit Jukaj.
[video width="662" height="360" mp4="https://cdnimpuls.com/lapsi.al/wp-content/uploads/2025/05/6817b451a9872.mp4"][/video]
Në fund, ishte Vllaznia ajo që festoi, duke marrë biletën për finalen e madhe të “Final 4”, ku do të ketë mundësinë të luftojë për titullin kampion të Shqipërisë. Dinamos, ndërkohë, i mbetet ngushëllimi i trofeut të Kupës së Shqipërisë, të fituar pak ditë më parë, si dhe kthimi në arenën europiane pas shumë vitesh mungesë.
[video width="662" height="360" mp4="https://cdnimpuls.com/lapsi.al/wp-content/uploads/2025/05/6817bd0359927.mp4"][/video]
