Një episod skandaloz është regjistruar në Kukës, ku drejtuesi politik i PS për Qarkun, Eduart Shalsi, dhe kandidati për deputet i kësaj force politike janë fotografuar brenda ambienteve të Drejtorisë së Policisë së Kukësit, në kulmin e fushatës elektorale për 11 majin.
Prania e përfaqësuesve politikë në ambientet e policisë nuk ka asnjë shpjegim ligjor apo institucional, përveçse si akt presioni ndaj efektivëve për votën. Sipas burimeve në terren, drejtuesit socialistë kanë mbledhur punonjës të policisë, duke zhvilluar një takim me qëllime elektorale, në kundërshtim të hapur me ligjin për zgjedhjet dhe Kodin e Etikës në Administratën Publike.
Ky veprim vendos një njollë të shëmtuar mbi policinë, e cila, si trupë e depolitizuar, nuk mund të përdoret për fushata dhe orientim të votës. Për më tepër, kjo ndodh në një zonë të ndjeshme si Kukësi, ku presioni institucional është shpesh më i madh për shkak të varësisë ekonomike nga shteti.
