Është zbuluar rezultati i votimit të parë të 133 kardinalëve të mbledhur në Kapelën Sistine në Vatikan për zgjedhjen e pasuesit të Papa Franceskut. Në orën 17:46 të së mërkurës ata bënë betimin dhe më pas u izoluan.
Votimi i parë pritej rreth orës 19.00, por rezultati u shfaq me 2 orë vonesë. Në oxhak ka dalë tym i zi që do të thotë se votimi i parë ka qenë i pasuksesshëm. Ky ka qenë një “zhgënjim” për 45 mijë njerëz të mbledhur në sheshin “Shën Pjetër”.
Kuriozët ishin besimtarë, pelegrinë, turistë dhe shumë të huaj. Pavarësisht turmës, mbretëronte një heshtje pothuajse sureale dhe e vetmja gjë që dëgjohej ishte rrotullimi i helikopterëve në qiell.
Të enjten pritet të ketë 4 votime të tjera. Po kështu edhe të premten. Askush nuk e di se çfarë ka ndodhur dhe arsyet që tymi në oxhak ishte i zi sepse ajo që ndodh në Kapelën Sistine ku zhvillohet votimi i Konklavës është një sekret absolut. /LAPSI.al
