Tom Cruise ka folur pozitivisht për ish-bashkëshorten e tij, Nicole Kidman, me të cilën ishte i martuar nga viti 1990 deri në 2001, gjatë një interviste për revistën “Sight and Sound”.
Ai e përshkroi eksperiencën në filmin e tyre të përbashkët “Eyes Wide Shut” si “një përvojë të mrekullueshme” dhe tha se ishte i emocionuar për ta realizuar. Ai shtoi se vetë sugjeroi që Kidman të luante rolin e bashkëshortes së tij në film, sepse ajo është “një aktore e shkëlqyer”.
Megjithëse ata rrallë flasin publikisht për martesën e tyre 11-vjeçare, Kidman ka thënë më parë se ende po shërohej nga ndarja me Cruise kur fitoi Oscar-in në vitin 2003 për filmin “The Hours”.
Pas ndarjes, Kidman u martua me këngëtarin Keith Urban dhe ata kanë dy vajza së bashku. Cruise, ndërkohë, u martua me Katie Holmes me të cilën ka një vajzë, Suri, por u divorcuan në vitin 2012.
Së fundmi, aktori është parë shpesh me aktoren Ana de Armas, duke shkaktuar thashetheme për një lidhje mes tyre. Ata kanë festuar ditëlindjen e saj në një park në Londër dhe kanë marrë pjesë së bashku në festën e 50-vjetorit të David Beckham. Megjithatë, një burim ka deklaruar për Page Six se, ndonëse duken se e shijojnë shoqërinë e njëri-tjetrit, “nuk ka prova që është diçka romantike”.
