FSHF, kërkesa mbi kapacitetin e stadiumit kundër Serbisë: Ja si do të procedohet

Qershori po afron e bashkë me të edhe sfida me Serbinë, për kualifikueset e Botërorit 2026. Kjo është ndeshja e tretë për kuqezinjtë dhe e para për serbët, por ndeshja më e ndjerë për dy tifozeritë, duke patur parasysh edhe ngjarjet e vitit 2015. Pikërisht për këtë arsye të gjithë tifozët kuqezi duan të jenë të pranishëm për këtë përballje. Për shkak të interesit të jashtëzakonshëm për ndeshjen Shqipëri – Serbi, e vlefshme për kualifikueset e Kampionatit Botëror 2026, Federata e Futbollit (FSHF) njofton se do të ndjekë një procedurë të posaçme për shitjen e biletave, me qëllim menaxhimin sa më efikas të kërkesës së lartë nga tifozët shqiptarë. Duke qenë se kërkesat pritet të tejkalojnë kapacitetin e stadiumit, FSHF bën me dije se nuk do të ketë shitje të menjëhershme të biletave, por do të ndiqet një procedurë ndryshe nga herët e tjera.

Procedura për pajisjen me biletë

– Tifozët do të kenë mundësinë të plotësojnë një formular aplikimi elektronik, për të shprehur interesin e tyre për të siguruar bileta. Ky formular do të publikohet nga FSHF më 15 maj 2025. – Çdo aplikant mund të kërkojë deri në 4 bileta. – Pas përfundimit të afatit të aplikimeve, do të kryhet një përzgjedhje e rastësishme dhe automatike përmes shortit kompjuterik të aplikantëve, të cilët do të kenë më pas mundësinë për të blerë biletat. – Të përzgjedhurit do të njoftohen disa ditë para ndeshjes nëpërmjet adresës së tyre elektronike. – Pas njoftimit, ata do të marrin një link unik për të kryer pagesën online, në periudhën 30 maj – 2 qershor 2025. – Pas konfirmimit të pagesës, biletat elektronike do të dërgohen në adresën e regjistruar të emailit. FSHF thekson se bileta mund të transferohet vetëm një herë. Çdo transferim i mëtejshëm do ta bëjë biletën të pavlefshme.

📢 Biletat për Shqipëri – Serbi | Informacion i rëndësishëm! https://t.co/WkNSFB8jee

— FSHF (@FSHForg) May 12, 2025