Matthew David Hughes, 32 vjeç, është shpallur fajtor për hyrje të paligjshme në banesë në shkallë të parë dhe përndjekje të rënduar ndaj reperit Eminem (Marshall Mathers).
Vendimi u mor më 7 maj në një gjykatë të qarkut Macomb, Michigan, dhe dënimi do të shpallet më 17 qershor.
Ky rast lidhet me një incident të ndodhur në gusht 2024, kur Hughes u fut në shtëpinë e Eminem në Clinton Township. Eminem ishte në shtëpi në atë kohë, por nuk pati kontakt të drejtpërdrejtë me agresorin.
Kjo ishte hera e dytë që Hughes hynte në të njëjtën shtëpi. Në vitin 2020, ai kishte hyrë me forcë duke thyer një dritare me një tullë dhe kishte kërcënuar Eminem duke i thënë se kishte ardhur “për ta vrarë”.
Pas asaj ngjarjeje, Hughes u dënua me pesë vite prove dhe u lirua me kusht në maj 2024, përpara se të përsëriste veprën.
Prokurori i çështjes theksoi se fama e bën jetën e të famshmëve të vështirë dhe e përshkroi Eminem si një njeri që është detyruar të jetojë "në një ishull", për shkak të rrezikut të vazhdueshëm nga persona si Hughes.
