Edi Rama mbajti një fjalim në sheshin Skënderbej, nga ku shpalli fitoren e zgjedhjeve parlamentare të 11 majit.
Kryeministri nuk i kurseu ironitë për kreun e PD, Sali Berisha dhe opozitës.
“Mes dritës së Europës dhe errësirës së gropës së një kapele fake, Shqipëria zgjodhi dritën. Me zërin tonë dhe një radio të vjetër me ca tiki-take, Shqipëria zgjodhi korin tonë. Faleminderit Shqipëri. Në kujtesën time kjo fjalë fitoreje ka qenë më e vështirë për ta thenë atë se çfarë është për mua kjo fitore”, u shpreh Rama.
Kryeministri deklaroi se shqiptarët zgjodhën të ecin drejt rrugës europiane dhe refuzuan përçarjen e urrejtjen.
Rama e cilësoi mandatin e katërt të fituar si një mbështetje referendare për Shqipërinë që punon, nuk ndalet dhe synon anëtarësimin në Bashkimin Europian. “Shqiptarët zgjodhën dritën e yjeve të Europës dhe jo errësirën e humnerës,” u shpreh Rama, duke theksuar se fitorja është rezultat i besimit të mbjellë tek qytetarët gjatë një fushate 30-ditore.
"Jemi këtu në Sheshin e Skënderbeut për të mbjellur atë që korrëm në zemrat e shqiptarëve. Për 30 ditë shqiptarët gjykuan dhe ata vendosën që të na besojnë ne si PS mandatin e katërt. Ne mbollëm besim tek shqiptarët. Ne mbollëm krenari ende më të madhe për Shqipërinë europiane, prandaj mblodhëm votat e një mbështetjeje referendare. Ne jemi Shqipëria që punon e nuk ndalet. Shqiptarët zgjodhën një vend, që ngjitet në rrugën e BE dhe jo një Shqipëri të nxirë, mbushur me urrejtjes. Shqiptarët zgjodhën dritën e yjeve të Europës dhe jo errësirën e humnerën. Shqipëria zgjodhi kori tonë" - u shpreh Rama.
