Bashkëshorti i Cassie Ventura-s, Alex Fine, publikoi një deklaratë pas dëshmisë emocionale katër-ditore të saj kundër Sean “Diddy” Combs, në gjyqin për trafikim seksual.
“Gjatë pesë ditëve të fundit, bota ka qenë dëshmitare e forcës dhe guximit të gruas sime, teksa ajo çliroi veten nga e kaluara,” tha Fine në deklaratën e lexuar nga avokati Douglas Wigdor të premten.
“Kam ndjerë shumë emocione duke qenë aty. Kam ndjerë krenari të jashtëzakonshme dhe dashuri të pafundme për Cassie. Kam ndjerë zemërim të thellë që ajo është detyruar të qëndrojë përballë një njeriu që është përpjekur ta thyejë shpirtërisht.”
Fine vazhdoi me një mesazh të drejtpërdrejtë për Combs dhe të gjithë ata që e ndihmuan atë:
“Ta dish këtë: Nuk e theve. Nuk e theve shpirtin e saj, as buzëqeshjen e saj që ndriçon çdo dhomë. Nuk e theve shpirtin e një nëne që jep përqafimet më të ngrohta dhe luan lojërat më të çmendura me vajzat tona të vogla. Nuk e theve gruan që më ka bërë një burrë më të mirë.”
“Cassie shpëtoi Cassie-n. Vetë ajo u çliroi nga abuzimi, detyrimi, dhuna dhe kërcënimet. Ajo bëri punën për të luftuar demonët që vetëm një demon mund t’ia kishte bërë asaj.”
Cassie Ventura gjithashtu publikoi një deklaratë pasi përfundoi dëshminë:
“Kjo javë ka qenë jashtëzakonisht sfiduese, por gjithashtu jashtëzakonisht fuqizuese dhe shëruese për mua,” u lexua në deklaratën e saj.
“Shpresoj që dëshmia ime t’u ketë dhënë forcë dhe zë të mbijetuarve të tjerë dhe të ndihmojë ata që kanë vuajtur të flasin dhe të shërohen nga abuzimi dhe frika. Për mua, sa më shumë shërohem, aq më shumë kujtoj. Dhe sa më shumë kujtoj, aq më pak do harroj.”
Ajo e mbylli deklaratën duke kërkuar privatësi për veten dhe familjen e saj, ndërkohë që përgatitet për të sjellë në jetë fëmijën e saj të tretë.
Në sallën e gjyqit, avokatja e Combs, Anna Estevao, përpiqej të vinte në dyshim dëshminë e Ventura-s, duke u fokusuar në kohën e marrëdhënieve të saj me Combs dhe Fine.
Ventura dëshmoi se ishte përdhunuar nga Combs në gusht të vitit 2018, por dokumentet e mëparshme ligjore e kishin datuar ngjarjen në shtator të po atij viti.
Në gjyq u paraqitën mesazhe të mëparshme që sugjeronin se ajo kishte marrëdhënie intime me Combs edhe pas datës kur pretendonte se ishte përdhunuar. Ajo gjithashtu konfirmoi se kishte marrë një telefonatë FaceTime nga Fine gjatë një prej këtyre ndërveprimeve.
Ventura sqaroi se nuk ishte përdhunuar atë natë specifike, por tregoi se Fine më vonë mësoi për marrëdhënien e saj me Combs dhe kishte reaguar me zemërim.
Combs ka mohuar të gjitha akuzat dhe është deklaruar i pafajshëm në çështjen federale që përfshin konspiracion, trafikim seksual, dhe detyrim për prostitucion.
