Ka nisur në gjykatën e Tiranës procesi gjyqësor në mungesë ndaj Bledar Jambellit, i cili akuzohet se ka porositur vrasjen e komisarit Artan Cuku.
Prokuroria paraqiti konkluzionet e saj mbi akuzat ndaj Jambellit, ndërsa u vendos që më 3 qershor në orën 13:30, do të zhvillohet seanca për paraqitjen e pretencës. Më pas do të behet mbrojtja e të pandehurit.
Artan Cuku u ekzekutua teksa po hynte në banesën e tij në rrugën e “Kosovarëve” në Tiranë më datë 8 Prill të 2017-ës. Ai u qëllua me 5 plumba, katër në gjoks dhe një në kokë duke i marrë jetën.
Për vrasjen e komisarit ra në pranga Mikel Shallari, i cili u kthye në bashkëpunëtorin e drejtësisë dhe rrëfeu se porositësi ishte Bledar Jambelli. Ky i fundit u arrestua në Greqi disa vite më parë, por drejtësia helene refuzoi ekstradimin dhe vendosi ta lirojë nga qelia për ta arrestuar sërish në vitin 2022 në Athinë për një ngjarje të rëndë me pasojë plagosjen e 5 personave.
Hetimi zbuloi se motivi i krimit lidhet me arrestimin e Jambellit në kohën kur Cuku kryente detyrën e Drejtorit të Policisë Vlorë.
